საქართველოში უსახლკაროდ დარჩენილი ადამიანების რიცხვი საკმაოდ დიდია. ამ მხრივ, დედაქალაქი ერთ-ერთი გამორჩეულია, ქუჩაში მოხეტიალე მიუსაფრებს ყოველი ფეხის ნაბიჯზე ვაწყდებით. ეს ერთ-ერთი მწვავე საკითხია.
იმის გასარკვევად, თუ რა ღონისძიებები ტარდება და რა იგეგმება სახელმწიფოს მხრიდან ამ ადამიანების დასახმარებლად, „თბილისი თაიმსი“ თბილისის მერიას დაუკავშირდა.
ქვეყანაში უსახლკაროდ დარჩენილ ადამიანთა რიცხვი რამდენად მასშტაბურია, საშუალო სტატისტიკა როგორ გამოიყურება?
– თბილისის მუნიციპალიტეტში უსახლკარო პირის სტატუსის მინიჭების საკითხს „ქალაქ თბილისის მუნიციპალიტეტის მერიის უსახლკაროდ რეგისტრაციისა და თავშესაფარი ფართით უზრუნველყოფის კომისია“ განიხილავს, რომელიც 2015 წლის დეკემბერში შეიქმნა.
თბილისის მერიაში, უსახლკაროდ რეგისტრაციის მოთხოვნით, ამ ეტაპზე 4000-მდე პირის განაცხადია შემოსული. ინფორმაცია 741 პირზეა მოძიებული და მათგან უსახლკარო პირად რეგისტრაციის თაობაზე კომისიამ დადებითი რეკომენდაცია 275–ზე გასცა, ხოლო 191–ზე –უარყოფითი, დანარჩენ მოქალაქეთა შესახებ ინფორმაცია ზუსტდება.
როგორც ჩვენთვის ცნობილია, თბილისის რამდენიმე უბანში ამგვარი ადამიანებისთვის დროებითი თავშესაფარი-კარვებია გაშლილი. ქვეყანაში ასეთი დაწესებულება რამდენია?
– თბილისში, მოსკოვის გამზირზე, კარვების სახით თავშესაფარი ფუნქციონირებდა 2013-2015 წლებში. 2015 წლის დეკემბრიდან კი, ე.წ. კარვების ქალაქი აღარ არსებობს.
როგორც ჩემთვის ცნობილია, თბილისში, მოსკოვის გამზირზე მდებარე კარვები ამჟამად დაშლილია, იქ მაცხოვრებლებს რა ბედი ეწიათ?
– მიუსაფარი პირებისთვის თბილისში, სოფელ დიდი ლილოს ტერიტორიაზე, 2015 წელს აშენდა კაპიტალური კეთილმოწყობილი თავშესაფარი, სადაც კარვებში მცხოვრები ბენეფიციარები იქნენ გადაყვანილი.
უსახლკაროთა შერჩევა როგორ ხდება, თავისუფალი ადგილები დარჩენილია თუ არა და ერთ ბენეფიციარზე რამდენი ლარია გამოყოფილი?
– მიუსაფარი პირები პირადად მიმართავენ თავშესაფარს ან ისინი თავშესაფარში პატრულს გადაყავს, სადაც სოციალურ მუშაკებთან და სამედიცინო ჯგუფთან გასაუბრების შემდეგ, ისინი თავშესაფრის ბენეფიციარები ხდებიან.
ლილოს მიუსაფართა თავშესაფარი 240 ბენეფიციარზეა გათვლილი, სადაც ისინი უზრუნველყოფილნი არიან დროებითი საცხოვრებლით, გათბობით, ცხელი და ცივი წყლით, ორჯერადი კვებით, პირველადი სამედიცინო მომსახურებით.
თავშესაფარში ყოველდღიურად, საშუალოდ, 110–130 ადამიანი ათევს ღამეს.
რამდენი ადამიანი ემსახურება ამ ადამიანებს და როგორ ხდება მომსახურე პერსონალის შერჩევა?
– ლილოს თავშესაფრის ბენეფიციარებს, მათი რესოციალიზაციის მიზნით, ემსახურება ხუთი სოციალური მუშაკი, ფსიქოლოგი, ასევე, უსაფრთხოების სამსახური და სამედიცინო პერსონალი, რომლებიც მათი პროფესიონალიზმიდან გამომდინარე არიან შერჩეულნი.
როგორია გეგმები. მომდევნო წლისთვის ბიუჯეტის ზრდა თუ იგეგმება, ასევე საინტერესოა თუ იგეგმება მსგავსი თავშესაფრების დამატება?
– 2017 წლის ბიუჯეტის ძირითადი პარამეტრები შემუშავების სტადიაშია და წლის ბოლოსთვის გახდება ცნობილი, ხოლო რაც შეეხება ახალი თავშესაფრის მშენებლობას, ამ ეტაპზე, ამის აუცილებლობა არ არის, რადგან ლილოს თავშესაფარი სრულად აკმაყოფილებს დღეისათვის თბილისის წინაშე ამ კუთხით არსებულ მოთხოვნას.
ნინო ზარიძე
