უკვე 24 საათზე მეტია, თურქეთთან სასაზღვრო მიმოსვლა შეფერხებულია. განმარტებები ამ საკითხზე თურქეთის კონსულმა იასინ თემიზქანმა გააკეთა.
“მიმდინარეობს ინტენსიური მუშაობა, პრობლემა სისტემაში გუშინ, 19.00 საათზე გაჩნდა. თუმცა, როგორც მანამდე ვთქვით, ეს მხოლოდ სარფის საბაჟოს არ ეხება, ეს სისტემური ხარვეზი გვაქვს ყველგან, როგორც საჰაერო, ასევე სახმელეთო გამტარ პუნქტებზეც. სისტემა დროულად არ ირთვება ან ითიშება. მერწმუნეთ, ყველაფერს ვაკეთებთ, რომ ეს საკითხი მალე გადაიჭრას”, – განაცხადა თურქეთის კონსულმა ისინ თემიზქანმა.
უკვე მეორე დღეა, თურქეთში ფეხით გადასვლის მსურველები საზღვარს ისევ ვერ კვეთენ. ამ დროისთვის სასაზღვრო მონაკვეთზე მხოლოდ სატრანსპორტო საშუალებებს ატარებენ, ძირითადად თურქული სანომრე ნიშნებით და ისიც შეფერხებებით.
სამშობლოში დაბრუნება თურქეთში მყოფი საქართველოს მოქალაქეებისთვისაც გართულებულია. რამდენიმე საათიანი ლოდინის შემდეგ, რამდენიმე მათგანმა საზღვარი გვიან ღამით გადმოკვეთა. მათი თქმით, უპირატესობით მხოლოდ თურქეთის მოქალაქეები სარგებლობენ. ასევე, მათივე ინფორმაციით, რიგში დგომისას რამდენიმე ადამიანი შეუძლოდ გახდა.
ქართული და თურქული მხარის განმარტებით მიზეზი თურქული მხარის არსებული ტექნიკური პრობლემაა. როგორც თურქეთის საკონსულოში განაცხადეს, ელექტრონული სისტემის ხარვეზია ქვეყნის ყველა გამშვებ პუნქტზე. ისინი ვერ აკონკრეტებენ, როდის აღმოიფხვრება პრობლემა.
საზღვარზე ავტომობილით გადაადგილების შეფერხებამ საცობები ქართულ მხარესაც შეუქმნა. გადატვირთულია ყველა ავტოსადგომი რომელიც გონიო – სარფის ტერიტორიაზე მდებარეობს.
