ადიგენის რაიონ სოფელ მოხეში მცხოვრები მუსლიმები ღია ცის ქვეშ ლოცვას განაგრძობენ. პარალელურად კი სამცხე-ჯავახეთის სამხარეო ადმინისტრაციის შენობაში ე.წ. მოხეს კომისიამ მორიგი სხდომა გაიმართა და დაადგინა, რომ მოხეს „სადავო საკულტო ნაგებობა“ ძეგლთა დაცვის საანგეტოს გადაეცემა, მუსლიმებს კი სოფლის ცენტრში ახალ მეჩეთს აუშენებენ.
„1 დეკემბერს ადიგენის მუნიციპალიტეტის სოფელ მოხეში მდებარე კლუბის სტატუსით რიცხულ შენობასთან დაკავშირებით არსებული გარემოებების შემსწავლელი კომისიის“ გადაწყვეტილების თანახმად:
- პირველი: მუსლიმი თემისთვის შეთავაზებული იქნება რამდენიმე ადგილი სოფელ მოხეს ცენტრში ახალი მეჩეთის მშენებლობისათვის, რითაც მოიხსნება ლოცვის პრობლემა, ვინაიდან, მუსლიმმა თემმა უარი განაცხადა ძველი სალოცავი სახლის გამოსყიდვაზე სახელმწიფოს მხრიდან და შემდგომ მუსლიმთა სამმართველოსთვის გადაცემაზე.
- მეორე: ახალი მეჩეთისათვის ადგილის შერჩევისა და მუსლიმთა სამმართველოსათვის ადგილის გადაცემის შემდეგ, ე.წ. მოხეს შენობას მიენიჭება კულტურული მემკვიდრეობის ძეგლის სტატუსი, სავარაუდო სახელწოდებით „სადავო საკულტო ნაგებობა“.
შესაბამისი პროცედურების დაცვით, შენობა ამოირიცხება მუნიციპალიტეტის ბალანსიდან და გადავა კულტურული მემკვიდრეობისა და ძეგლთა დაცვის ეროვნული სააგენტოს ბალანსზე. ძეგლთა დაცვის სააგენტო მოამზადებს და კომისიას წარუდგენს ძეგლის სტატუსმინიჭებული სადავო საკულტო ნაგებობის სამომავლო მოვლა–შენახვის პროექტს და შემდგომ კომისიას გააცნობს მას.“-ნათქვამია რელიგიის სააგნენტოს განცხადებაში.
აღნიშნულ გადაწყვეტილებასთან დაკავშირებით ურთიერთგამომრიცხავი პოზიცია აქვთ სრულიად საქართველოს მუსლიმთა სამმართველოს, ქართველ მუსლიმთა კავშირს.
მუფთები, რომლებიც კომისიაში მუსლიმთა ინტერესებს წარმოადგენენ ამბობენ, რომ რელიგიის სააგენტოს შეთავაზება, როგორც მათთვის, ასევე მუსლიმი თემისთვისაც მისაღებია. „იმედი გვაქვს, რომ მრევლი გონიერი და ნიჭიერია. ვიმუშავებთ, რომ ეს პრობლემა ერთხელ და სამუდამოდ მოვაგვაროთ. ჯერ მიწა უნდა შეირჩიეს, მერე ის გადაეცეს სამუფთო სამმართველოს და ამის შემდეგ შეიძლება დავიწყოთ საუბარი თუ როდის აშენდება ახალი მეჩეთი. ჩვენ გვიყვარს ჩვენი მრევლი, ვენდრობით მათ და აუცილებლად გვენდობიან ისინიც, როცა დადებითად გადაწყდება ყველაფერი,“ – აცხადებს დასავლეთ საქართველოს მუფთი ბეგლარ ქამაშიძე „სამხრეთის კარიბჭესთან“ საუბრისას.
ქართველ მუსლიმთა კავშირის თავმჯდომარე ბატონი ტარიელ ნაკაიძე სოციალური ქსელით ეხმაურება კომისიის გადაწყვეტილებასა და მუსლიმთა სამმართველოს განცხადებას: „ვფიქრობ აღნიშნული გადაწყვეტილების სისრულეში მოყვანით ხელისუფლება დაუშვებს პრეცენდეტს საქართველოში მცხოვრები სხვადასხვა რელიგიური თემის საკუთრების წართმევას. გაამძაფრებს და წაახალისებს დომინანტი რელიგიების წადილსა და სურვილებს. მოხის მეჩეთის საკითხი გასცდა, მხოლოდ საკულტო ნაგებობის მესაკუთრეზე დაბრუნების საკითხს. ეს არის საქართველოს დემოკრატიულ განვითარების, საქარველოს ისტორიული მრავალფეროვნების წინააღმდეგ გადადგმული ამავე დროს ანტისახელმწიფოებრივი ნაბიჯი. ასევე ვფიქრობ ეს საკითხი საღად მოაზროვნე საქართველოს ყველა მოქალაქეს საქმედ უნდა იქცეს. აქვე დავამატებ რომ ვწუხვარ მუსლიმთა სამმართველოს არა ადეკვატური მიდგომის გამო, რომელმაც პრაქტიკულად ვერ დაიცვა მუსლიმების უფლებები. უფრო მეტიც ხელი შეუწყო მეჩეთის პრაქტიკულად ჩამორთმევას,“- წერს ტარიელ ნაკაიძე.
ადგილობრივი მუსლიმები ამბობენ, რომ ახალი მეჩეთის ასაშენებლად ტერიტორიის შერჩევაში მონაწილეობას არ მიიღებენ. უნდობლობას უცხადებენ კომისიაში მონაწილე თავიანთ სასულიერო ლიდერებს, მოითხოვენ კომისიის გაუქმებას და იმედი აქვთ, რომ საბოლოოდ სადავო შენობა მათ გადაეცემათ. ადგილობრი ქრიტიანები, ისევე როგორც კომიისიაში მონაწილე მართლმადიდებელი სასულიერო პირები სოფლის ცნეტრში მეჩეთის აშენების წინააღმდეგნი არ არიან და თვლიან რომ ამ გადაწყვეტილებით სოფელ მოხეში მუსლიმი მრევლისთვის ლოცვის პრობლემა საბოლოოდ გადაიჭრება.
მუსლიმი თემი არ გამორიცხავს, რომ კომისიაში მყოფ მუფთზე ზეწოლა ხორციელდება. ისინი ლოცვის გაგრძელებას სადავო შენობის ტერიტორიაზე გეგმავენ.
„ეს ისტორიული მეჩეთი არსდროს ყოფილა სადაო და არც ახალ მეჩეთს ითხოვენ ადგილობრივები. ვწუხვარ სამუფთო სამმართველოს წარმომადგენელბის პოზიციაზე იმასთან დაკავშირებით, რომ არ უსმენენ თავის მრევლს. დღეს თოვლსა და ყინვაში მათთთან ერთად შევასრულე პარასკევის ლოცვა და დავინახე, როგორ გაულურჯდათ სახეები ყინვისაგან განსაკუთრებით მოხუც ადამაინებს. მე ვერ წარმომიდგენია როგორ , რა სინდისით სხედან სამუფთოს მესვეურნი თბილ კაბინეტებში.
მე არ მოვითხოვ მათგან ( ვგულისხმობ მუსლიმთა სამმართველოს) გადაჭრან ეს პრობლემა, მაგრამ მე იმას მოვითხოვ მათგან თვაიანთ ხალხს მოუსმინონ და დადგნენ მათ გვერდით… მესმის, რომ მათ სიტყვას არანაირი ფასი არა აქვს ამ კომისიაში. ამიტომ მოვუწოდებ მათ! თუ საქმე ასე დგას, ( და ასე დაგს როგორც ჩანს) რომ უარს ამბობენ ამ შენობის გადმოცემაზე მაშინ უბრალოდ დატოვონ კომისია. ღიად საჯაროდ აღიარონ, რომ ძალა არ შესწევთ ამ პრობლემის რაიმე საკით მოგავრებისა. ამამაზე კი არავინ შერაცხავს მათ.
ხოლო, რელიგიის სააგენტოს, გუბერნატორს და გამგებელს თავიანთ მოძღვართან ერთად რაც სურს ის მიიღონ. ჩვენ გვესმის, რომ სახემწიფოს წარმოადგენენ და ყოველი ძალა შესწვეთ როგორც სურთ ისე მოიქცნენ. გვესმის, რომ მთელი მთავრობა ერთ მხარესა და ქართველი მუსლიმები მარტოდ მეორე მხარეს.“- წერს იმამი ჯამბულ აბულაძე საკუთარ „ფეისბუქ“ გვერდზე.
როგორ დასრულდება 2 წლიანი გადაუჭრელი ე.წ. სადავო ნაგებობის საკითხი, რა გადაწყვეტილებას მიიღებენ მუფთები, გაითვალისწინებენ თუ არა ღია ცის ქვეშ მლოცველი მუსლიმების მოთხოვნებს კომისიის მორიგ სხდომაზე გაირკვევა, რომელიც 30 იანვარს თბილისში, მთავრობის კანცელარიაში გაიმართება.
სოფიკო ნინიკაშვილი
