სამშენებლო დარგი ერთ-ერთი ყველაზე სტაბილურია ბიზნეს-სექტორში. ამას ადასტურებს საქსტატის მონაცემები, რომლის თანახმად, 2016 წლის განმავლობაში მშენებლობაში აღინიშნებოდა 2,4%-იანი მატება. გაზრდილია სამშენებლო დარგის ბრუნვის მოცულობაცა და დასაქმებულთა რიცხვიც. სამშენებლო კომპანიები მრავალფეროვან არჩევანს სთავაზობენ, თბილისში იგეგმება ახალი საცხოვრებელი უბნების გაჩენა. ამის მიუხედავად, ექსპერტთა ნაწილი ეჭვს გამოთქვამს, რომ ახალაშენებული სახლების უმრავლესობა ვერ აკმაყოფილებს ძირითად სტანდარტებს. როგორ მოწმდება მშენებლობის ხარისხი, რა სახის მონიტორინგს ატარებს სახელმწიფო და ქალაქის ადმინისტრაცია. ამის გარკვევა “თბილისი თაიმსმა“ სცადა.
მშენებლობის ნებართვა
თბილისის არქიტექტურის სამსახურის ინფორმაციით, წელს ადმინისტრაციამ გასცა 1212 მრავალბინიანი კორპუსის მშენებლობის ნებართვა, ხოლო კერძო სახლებზე გაცემული ნებართვების რაოდენობა 2787-ს მიაღწია. იმისათვის, რომ დაინტერესებულმა პირმა დააკმაყოფილოს ნებართვის მისაღებად განკუთვნილი კრიტერიუმები, მან განცხადებას უნდა დაურთოს ინფორმაცია მიწის ნაკვეთის რეგისტრაციის შესახებ. ასევე სავალდებულოა, სამშენებლო მონაკვეთის კვლევის ანალიზიც.
გარდა ამისა, კომპანიამ თუ კერძო პირმა ასევე, საჭიროების შემთხვევაში, უნდა იქონიოს შენობა-ნაგებობის კვლევა და კონსტრუქციული ნაწილის საექსპერტო შეფასება, რომელიც ადგენს დასამტკიცებელი შენობის სეისმურ ნორმებთან შესაბამისობას.
მშენებლობის ნებართვის გაცემა 3 სტადიად მიმდინარეობს. ითვალისწინებენ მიწის ნაკვეთის სამშენებლოდ გამოყენების შესაძლებლობას, ასევე არქიტექტორული პროექტის კონსტრუქციულ ან/და ტექნოლოგიურ შეთანხმებას და მის საბოლოო დამტკიცებას.
მონიტორინგი
მშენებლობის განმავლობაში ხორციელდება 3 სახის მონიტორინგი: საავტორო, ტექნიკური და სახელმწიფო.პირველ მათგანზე პასუხისმგებლობას იღებს არქიტექტორი ან ინჟინერ-დამპროექტებელი. ტექნიკური ზედამხედველობა დამკვეთს ეკისრება. რაც შეეხება სახელმწიფოებრივ მონიტორინგს, მას თბილისის მერიის ზედამხედველობის სამსახური ახორციელებს. მის მოვალეობებში შედის სანებართვო პირობების შესრულებისა და შენობა-ნაგებობის ექსპლუატაციაში მიღების კონტროლი, ასევე უნებართვო ან კანონმდებლობის დარღვევით განხორციელებული მშენებლობების გამოვლენა და მასზე შესაბამისი რეაგირება.
არქიტექტორ ლევან კალანდარიშვილის თქმით, ზედამხედველობის სამსახურის საქმიანობა ფორმალურ ხასიათს ატარებს:
“ზედამხედველობის სამსახური ეფემერული ორგანიზაციაა, რომელიც მიდის და აფიქსირებს, რომ რაღაცა შენობა სტანდარტებს არ შეესაბამება. ამით მათი საქმიანობა მთავრდება, რადგან ეს მიმდინარეობს სახელმწიფო მიდგომიდან, რომელიც არ არსებობს. დაახლოებით იმას ჰგავს, მოდით, ავაშენოთ და მერე ვიფიქროთ, ეს აშენებული როგორ გამოვასწოროთ.“
როგორც ცნობილი გახდა, რომ უკვე აშენებული კორპუსის მდგრადობის უზრუნველყოფა და შემოწმება მის მესაკუთრეზეა დამოკიდებული.
სამშენებლო კომპანიები და ხარისხის კონტროლი
ჩვენ გამოვკითხეთ სამშენებლო სექტორის ორი წამყვანი კომპანია, “დირსი“ და “აქსისი“, თუ როგორ მოწმდება მშენებლობისთვის საჭირო ინვენტარი. “დირსის“ სტრატეგიული კომუნიკაციების მენეჯერის არჩილ თავბერიძის თქმით, “დირსის“ საცხოვრებელი კორპუსის მშენებლობის დაწყებამდე კომპანიამ იმ ტერიტორიაზე მოაწყო იტალიური წარმოების 2 ბეტონის ქარხანა და ლაბორატორია. იყენებენ სპეციალურ დანამატებს, რომლებიც იცავენ ბეტონში მოქცეულ არმატურას კოროზიისგან. თავბერიძე ამბობს, რომ შენობის მდგრადობა დიდწილად დამოკიდებულია მშენებლობის ტუნელურ-ყალიბურ ტექნოლოგიაზე, რომლის გამოყენებისას შენობის 80 % საყრდენ ნაგებობას წარმოადგენს.
“აქსისის“ გენერალური დირექტორის აზრით, საცხოვრებელი კორპუსის ვადა დიდწილადაა დამოკიდებული შემავსებელ მასალაზე. ყველა მასალა გადის შემოწმებას სპეციალურ ლაბორატორიაში, ხოლო კორპუსის აგებისას გამოყენებული ტექნიკა ნაგებობას სიმყარის უზრუნველყოფს და 8-ბალიან მიწისძვრაზეა გათვლილი.
ექსპერტის შეფასება
“კარგს იმას ვხედავ, რომ მშენებლობის ტემპი არ კლებულობს, მაგრამ მიმდინარეობს ყოვლად გაუაზრებლად. ვერანაირი მექანიზმი ვერ ავამოქმედეთ, რომელიც დეტალურად შეისწავლის, რამდენად იყო დაცული ნორმები. თვითონ ქალაქი ვერ იაზრებს, რა მხარეს უნდა წავიდეს ბინათმშენებლობა. შედეგად ვიღებთ ქაოტურ განვითარებას,“-ამბობს არქტექტორი ლევან კალანდარიშვილი.
მისი აზრით, ბევრი იქნება დამოკიდებული ქალაქის მომავალ გენერალურ გეგმაზე, კერძოდ, მიწათმოწყობის ნაწილზე, რომელიც ჯერ კიდევ მუშავდება. მეტწილად ეს დოკუმენტი განსაზღვრავს, რამდენად გაამახვილებს ქალაქის მერია ყურადღებას არა იმდენად რაოდენობაზე, არამედ ხარისხზე.
ანა მებურიშვილი
