ხელოვნური ინტელექტის შესაძლებლობები ამოუწურავია. მკვლევარებმა შექმნეს ხელოვნური ინტელეტის პროგრამა, რომელსაც ზუსტად შეუძლია განსაზღვროს, როდის მოკვდება პაციენტი გულის დაავადებით. მეცნიერები იმედოვნებენ, რომ აღნიშნული პროგრამით სარგებლობას ექიმები მალე შეძლებენ, რათა უფრო ზუსტი გადაწყვეტილებები მიიღონ და უტყუარი დიაგნოზი დასვან. მათი რწმენით, ხელოვნური ინტელექტის მორიგი შედევრი ექიმებს პაციენტის მდგომარეობის ბოლომდე შესწავლაში დაეხმარება.
პროგრამა პაციენტების პულმონარული ჰიპერტენზიის მაგნიტორეზონანსული ტომოგრაფიის შედეგების ანალიზის მიხედვით მუშაობს. ის აკონტროლებს პულსს და აფიქსირებს გულის 30,000-მდე წერტილს, რის შემდეგაც ქმნის თითოეული პაციენტის გულის 3D გამოსახულებას.
აღნიშნული კვლევის შედეგები ჟურნალ Radiology-ში გამოქვეყნდა.
“პროგრამა წამებში აანალიზებს მოცემულობას და ადამიანის ჩარევის გარეშე ქმნის მონაცემების ვიზუალურ გამოსახულებას. მისი წყალობით ექიმები პაციენტებისთვის უტყუარი დიაგნოზის დასმას შეძლებენ“, – ამბობს დოქტორ ტიმ დეივისი, რომელმაც პროგრამის ფუნქციონირებისათვის შექმნა სპეციალური ალგორითმი.
ამ დროისთვის აღნიშნული პროგრამა მხოლოდ პულმონარული ფიპერტენზიის მქონე პაციენტებზე შემოწმდა. პულმონარული ჰიპერტენზია იმ ტიპის დაავადებაა, რომლის დროსაც ადგილი აქვს სისხლის წნევის რამდენიმე ათეული პუნქტით მომატებას. პაციენტი შეიძლება ვერ ამჩნევდეს გართულებას, რამაც შეიძლება დაავადება უფრო გაამწვავოს.
მეცნიერები იმედოვნებენ, რომ აღნიშნული პროგრამა კიდევ უფრო დაიხვეწება და მისი გამოყენება გულის ყველა ტიპის დაავადებების დასადგენად იქნება შესაძლებელი. მკვლევრები ამ პროგრამის მომდევნო ტესტირებას დიდი ბრიტანეთის რამდენიმე საავადმყოფოში გეგმავენ.
წყარო: on.ge
მარიამ ლეკიაშვილი
