საქართველოს ამომრჩეველი, გასულ არჩევნებთან შედარებით, ღია და თავისუფალი საარჩევნო გარემოთი სარგებლობს, – ამის შესახებ NDI-ის წინასაარჩევნო დელეგაციის ანგარიშშია ნათქვამი.
დოკუმენტის თანახმად, საპრეზიდენტო კანდიდატებს საშუალება აქვთ ესაუბრონ ელექტრორატს მედიის საშუალებით და, საპარლამენტო ოპოზიციის მაღალი თანამდებობის პირებთან დაკავშირებული რამდენიმე შემთხვევის გარდა, დაუბრკოლებლად შეხვდნენ ამომრჩეველს.
“სამოქალაქო საზოგადოების წევრებს საარჩევნო ადმინისტრაციის თანამდებობის პირებზე ხელი მიუწვდებათ. ახალი საარჩევნო კოდექსი წინა არჩევნების დროს გამოვლენილ რამდენიმე გამოწვევას პასუხობს. საქართველოს ელექტორატს საშუალება აქვს, თვალყური ადევნოს პლურალისტურ და ხმაურიან პოლიტიკურ დებატებს. NDI-ის სადამკვირვებლო დელეგაციასთან პოლიტიკური აქტორების მიერ გამოთქმული შეშფოთებები სერიოზულია, თუმცა წინა წელთან შედარებით – ნაკლებად გავრცელებული”, – ნათქვამია ანგარიშში.
როგორც NDI–ის პრეზიდენტმა კენეთ ვოლაკმა ანგარიშის პრეზენტაციისას განაცხადა, თუ საქართველო საერთაშორისო სტანდარტების შესაბამის საპრეზიდენტო არჩევნებს ჩაატარებს, ეს ხელს შეუწყობს დემოკრატიული კულტურის განვითარებას და რეგიონში განსაკუთრებული მიღწევა იქნება.
“თუმცა, ამის მისაღწევად ქართველი მაღალჩინოსნები უნდა გაუმკლავდნენ იმ საკითხებს, რომლებმაც, შესაძლოა, საარჩევნო პროცესის სანდოობაზე უარყოფითი გავლენა მოახდინოს. დელეგაციამ მოისმინა სერიოზული შეშფოთებები პოლიტიკურად მოტივირებული ძალადობის, დაკითხვებისა და გამოძიებების, ადგილობრივ დონეზე პოლიტიკური ხელისუფლების არჩევნების გარეშე ცვლილებისა და უმცირესობების მიმართ შეუწყნარებლობის შესახებ. ყველა პოლიტიკურ აქტორს ეკისრება პასუხისმგებლობა, საკუთარი პოლიტიკური მიზნების მისაღწევად გამოიყენონ საქართველოს დემოკრატიული ინსტიტუტები და პროცესები”, – ნათქვამია ანგარიშში.
NDI-ის წინასაარჩევნო დელეგაციის შეფასებით, იმის მიუხედავად, რომ ახალი პრეზიდენტი საქმიანობას შემცირებული კონსტიტუციური ძალაუფლებით შეუდგება, მას შეუძლია, შექმნას მმართველობის ისეთი მაგალითი, რომელიც საქართველოს დემოკრატიას გაამყარებს.
NDI-ის დელეგაცია, წინასაარჩევნო გარემოს შეფასების მიზნით, საქართველოს 2 სექტემბერს ეწვია. ვიზიტის ფარგლებში გაიმართა შეხვედრები ხელისუფლებასთან, საარჩევნო ადმინისტრაციასთან, საპრეზიდენტო კანდიდატებთან, პოლიტიკური პარტიის ლიდერებთან, სამოქალაქო სექტორის და საერთაშორისო ორგანიზაციების წარმომადგენლებთან.
დელეგაციის წევრები არიან მისურის შტატის ყოფილი მდივანი რობინ კარნაჰანი, საქართველოში ევროკავშირის დელეგაციის ყოფილი ხელმძღვანელი და სტოკჰოლმის უსაფრთხოებისა და განვითარების ინსტიტუტის უფროსი მკვლევარი პერ ეკლუნდი; ნიუ ჯერსის შტატის ყოფილი გუბერნატორი და გარემოს დაცვის სააგენტოს ყოფილი ადმინისტრატორი კრისტინ ტოდ უიტმანი; ატლანტიკური საბჭოს აღმასრულებელი ვიცე-პრეზიდენტი დეიმონ უილსონი; NDI–ის პრეზიდენტი კენეთ ვოლაკი; NDI–ის ევრაზიის რეგიონალური პროგრამების დირექტორი ლორა ჯუიტი და NDI-ის საქართველოს ოფისის დირექტორი ლუის ნავარო.
06.09.13
