სწორი მაკიაჟის გაკეთება თითქმის ყველა ქალბატონის ოცნებაა, რაც განსაკუთრებულ ყურადღებასა და მოთმინებას მოითხოვს. დღესდღეობით საკმაოდ ბევრი ვიზაჟისტი მუშაობს ამ კუთხით. ყოველ წელსა და სეზონზე სხვადასხვა სახის ტენდენციები გვხვდება.
,,თბილისი თაიმსს“ 2017 წლის მაკიაჟის ტენდენციებზე ვიზაჟისტი ქეთო ჩანთაძე ესაუბრა.
მოგვიყევით თქვენ შესახებ, რამდენი ხანია, რაც ვიზაჟისტობით ხართ დაკავებული და რამ განაპირობა თქვენი არჩევანი ამ მიმართულებით გაგეგრძელებინათ საქმიანობა?
– 17 წლის ასაკში დავინტერესდი მაკიაჟით, ვხატავდი ბავშვობიდან ეს კიდევ იგივე ხატვაა ოღონდ სახეზე, ძალიან საინტერესო მეჩვენა, თანაც ვიცოდი, რომ თუ ხელს მოვკიდებდი კარგი პროფესიონალი დავდგებოდი და კარგი შემოსავლის წყაროც მექნებოდა მომავალში.
გვესაუბრეთ 2017 წლის მაკიაჟის ტენდენციებზე, სახის რომელი ნაკვთები უნდა გამოიკვეთოს, რას მიექცევა მეტად ყურადღება?
– 2017 წლის ტენდეციებში ძირითადად ხაზი იმას გაესვა, რომ დიდი რაოდენობის მაკიაჟი არაესთეტიურია, რაც დრო გადის უფრო მეტად აფასებს ხალხი ბუნებრივ სილამაზეს და მინიმალურ მაკიაჟს, რასაც მეც ვემხრობი, რაც შეეხება ინსტაგრამის ტრენდებს რაც არასდროს მე პირადად არ მომწონს ჰაილაითერია ( გადაჭარბებული) მაგრამ თვითონ ჰაილაითერის ტენდენცია კარგია, რადგან კანის ცოტა პრიალი საჭირო ადგილებში ყოველთვის კარგ შედეგს იძლება, სახე ნაზი და დასვენებული ჩანს.
ახლა შემოდგომის პერიოდია და რომელი ფერები სჭარბობს მაკიაჟის გაკეთების დროს?
– შემოდგომა ისეთი პერიოდია, რომელსაც, ჩემი აზრით, ბალანსი სჭირდება. ფერებიც თბილი უნდა იყოს.
რით განსხვავდება ყოველდღიური მაკიაჟი სადღესასწაულო მაკიაჟისგან და რა ეტაპებს მოიცავს?
– სადღესასწაულო მაკიაჟი მძიმე და დატვირთულია, მეტი აქცენტია გაკეთებული თვალებზე და ტუჩებზე, დღის მაკიაჟი შეიძლება ძალიან მსუბუქი იყოს და ცოტა დრო სჭირდება.
რას უნდა მიაქციონ ძირითადად ყურადღება ეფექტური შედეგების მისაღებად?
– კითხვა ძალიან ზოგადია, მაგრამ ნებისმიერ შემთხვევაში, ალბათ, მთავარია, რომ მაქსიმალისტი იყოს არტისტი, მე პირადად პედანტიც ვარ, რაც ჩემს საქმეში ძალიან მნიშვნელოვანია, სანამ არ იქნებით კმაყოფილი არ უნდა გაჩერდეთ.
ასაკის მატებასთან ერთად იცვლება კანის სტრუქტურა და ფერი, რით განსხვავდება ახალგაზრდული მაკიაჟი საშუალო ასაკის ქალბატონების მაკიაჟისგან?
– ასაკოვან კანს სხვანაირი გამუშავება სჭირდება, ბევრი მაკიაჟის ხმარება ამ დროს არ შეიძლება, ეს უარესია, ფერი აუცილებლად თბილ ტონებში უნდა იყოს და ნაკლები მკვეთრი ხაზები.
როგორც საზოგადოებისთვის ცნობილია, გრიმიორი ბრძანდებით, რომელიც ურთულესი საქმეა, თქვენი აზრით, რა არის უმნიშვნელოვანესი იმისთვის, რომ მიზანს მიაღწიო?
– გრიმი, რა თქმა უნდა, ძალიან რთული და აბსოლუტურად განსხვავდება ვიზაჟისგან, გრიმის ცოდნა ძალიან ბევრი რამის ცოდნას ნიშნავს, ეს არის ხელობა სადაც ხატვაც უნდა იცოდეთ, ძერწვაც, ანატომიაც, ფერების გადანაწილება, კონტრასტი ბალანსი, უნდა გქონდეთ უზომოდ დიდი ფანტაზიის უნარი და რაც მთავარია მზად იყოთ დაუღალავი შრომისთვის, მძიმე პროფესიაა, რადგან ერთ ადამიანზე უამრავი რამ არის დამოკიდებული, როგორ გააცოცხლებენ თქვენს საყვარელ პერსონაჟს თავიდან ბოლომდე გრიმიორის ხელშია. მიზნის მისაღწევად შრომაა საჭირო, ასევე დიდი რისკი, მე გაუჩერებლად ვმუშაობდი საკუთარი თავის განვითარებაზე და ასევე უდიდეს რისკზე წავედი ბევრჯერ, მაგრამ რისკი მეოორეხარისხოვანია თუ ძალიან გსურთ მიზნის მიღწევა, ყველაფერს გააკეთებთ იმისთვის რომ მიაღწიოთ მიზანს, თუ ეს მართლა გსურთ. ამ დროს ადამიანს უნდა ახსოვდეს, რომ მას ბევრი რამის გადადება მოუწევს უკან, ეს ძალიან დამღლელი და ურთულესი პროცესია, მთავარია არ დანებდეს ამ პროცესში ადამიანი.
მოგვიყევით თქვენი მიღწევების შესახებ, როგორია სამომავლო გეგმები…
ამჟამად მივემგზავრები ჰოლივუდში, Cinema Make up School არის მსოფლიოში წამყვანი გრიმის სკოლა, რომელიც 20 წელია ოსკაროსან გრიმიორებს ამზადებს, ამ სკოლაში მივიღე მონაწილეობა და გავედი მეორე ადგილზე, გავყიდე სახლი, რადგან დავიფინანსო სწავლა. ჩემი მომავალი ჰოლივუდია…
ეკა წიკლაური
