ფონიჭალაში, 206-ე ბაღში მომხდარი უბედური შემთხვევის საქმეზე სამართალდამცველებმა გამოძიება დაიწყეს. რამოდენიმე დღის წინ ბაღის შენობის მეორე სართულიდან 3 წლის გოგონა გადავარდა. ამ დროს, ჯგუფის დანარჩენ ბავშვებთან ერთად, ორი აღმზრდელი, სავარაუდოდ, გვერდით ოთახში იმყოფებოდა.
გოგონა სამედიცინო დაწესებულებაში სასწრაფო დახმარების ექიმებმა გადაიყვანეს. მცირეწლოვანი ბავშვის მდგომარეობა ამ დრომდე მძიმეა. ასეთ შემთხვევებში პასუხისმგებლობა აღმზრდელებს ეკისრებათ.
„თბილისი თაიმსი“ საბავშვო ბაგა-ბაღების მართვის სააგენტოს დაუკავშირდა. იგეგმება თუ არა პედაგოგების გადამზადება, ინტერვიუდან შეიტყობთ.
ახალ სასწავლო წელს, საბავშვო ბაგა–ბაღებმა, რამდენი აღსაზრდელი მიიღო?
– 2017 წლის 29 სექტემბრის მონაცემებით, თბილისის საჯარო ბაღებში 61 463 აღსაზრდელია რეგისტრირებული.
გავრცელდა ინფორმაცია, რომ თუკი საბავშვო ბაღში ინფრასტრუქტურა გამართული არ იქნება, სააღმზრდელო დაწესებულება აკრედიტაციას ვერ გაივლის. ეს სიმართლეს რამდენად შეესაბამება?
– დაწესებულების ავტორიზაციის პირობებია: 1. ავტორიზაციის მაძიებელი იურიდიული პირი/ავტორიზებული დაწესებულება აკმაყოფილებს ავტორიზაციის პირობებს, თუ: ა) დაწესებულებაში სწავლა/სწავლება ხორციელდება სკოლამდელი აღზრდისა და განათლების სახელმწიფო სტანდარტების, მათ შორის, სასკოლო მზაობის საგანმანათლებლო სახელმწიფო სტანდარტის, შესაბამისად; ბ) დაწესებულების შენობა-ნაგებობა, ინფრასტრუქტურა და მატერიალურ-ტექნიკური ბაზა და შენობა- ნაგებობის მოწყობა შეესაბამება საქართველოს მთავრობის მიერ დამტკიცებულ შესაბამის ტექნიკურ რეგლამენტს; გ) დაწესებულებაში სანიტარიულ–ჰიგიენური პირობები შეესაბამება საქართველოს მთავრობის მიერ დამტკიცებულ შესაბამის ტექნიკურ რეგლამენტს; დ) დაწესებულებაში კვების ორგანიზება და რაციონის კვებითი ღირებულება შეესაბამება საქართველოს მთავრობის მიერ დამტკიცებულ შესაბამის ტექნიკურ რეგლამენტს; ე) დაწესებულებაში ადამიანური რესურსის კვალიფიკაცია და გამოცდილება შეესაბამება საქართველოს მთავრობის მიერ დამტკიცებულ აღმზრდელ-პედაგოგის პროფესიულ სტანდარტს და სხვა პერსონალისთვის მუნიციპალიტეტის მიერ დადგენილ სტანდარტებს.
როგორც ცნობილი გახდა, გარკვეული ცვლილებები პედაგოგების კუთხითაც ამოქმედდება, აღმზრდელთა ხელფასები მათ კვალიფიკაციაზე იქნება დამოკიდებული. რას იტყვით ამ საკითხთან დაკავშირებით, სააგენტო ამ თემაზე რამდენად მუშაობს?
– „ადრეული და სკოლამდელი აღზრდისა და განათლების შესახებ“ კანონის მიხედვით, საქართველოს მთავრობამ, აღმზრდელ-პედაგოგის შრომის ანაზღაურების საბაზისო ზღვრული ოდენობის განსაზღვრის მიზნით, ნორმატიული აქტი უნდა მიიღოს. თბილისის საბავშვო ბაგა–ბაღების მართვის სააგენტოს, 2018 წლის ბიუჯეტის პროექტით, აღმზრდელ–პედაგოგების გადამზადებისთვის საჭირო თანხები აქვს გათვალისწინებული.
ნინო ზარიძე
