ბათუმში ძვირფასი ქვებისა და მინერალების მუზეუმი გაიხსნა. მუზეუმი თურქმა დოქტორმა, ბილალ სემიჰ ბოზდემირიმ დაარსა და მის სახელს ატარებს. მუზეუმში წარმოდგენილია 150-ამდე მინერალი.
”ძვირფასი ქვები და მინერალები, რომლებიც ექსპონატების სახითაა განთავსებული ამ მუზეუმში, მსოფლიოს ყველა ქვეყნიდანაა წარმოდგენილი, დამუშავებულ და დაუმუშავებელ ფორმაში. წელიწადში არსებობს 12 თვე და 12 სხვადასხვა ჰოროსკოპის ადამიანი იბადება, რომლებიც სხვადასხვა ძვერფას ქვას უნდა ატარებდნენ, დადებითი ენერგიისა და ცხოვრებისეული თუ საქმიანი წარმატებისთვის, ასევე ავი თვალისგან დასაცავად”, -აცხადებენ ძვირფასი ქვებისა და მინერალების მუზეუმში.
მუზეუმში წარმოდგენილ თითოეულ ქვას მოყვება აღწერილობა, რომლის წაკითხვაც ვიზიტორებს 4 ენაზე შეუძლიათ, ეს ენებია: ქართული, რუსული, ინგლისური და თურქული. აღწერაში მოცემული დეტალური ინფორმაცია, თუ რომელი ქვეყნიდან არის ეს კონკრეტული ქვა ჩამოტანილი, როგორია მისი პირვანდელი ფორმა და რა ქიმიური შემცველობისაა.
ბათუმის ძვირფასი ქვებისა და მინერალების მუზეუმი ოფიციალურად 2018 წლის 14 მარტს გაიხსნა. აქ შესვლა უფროსებისთვის 7 ლარი ღირს, 12 წლამდე ბავშვებისთვის–უფასოა, მოზარდებისთვის კი -3,50 ლარი ღირს.
მარიამ ლეკიაშვილი
