საქართველოს ფინანსთა მინისტრი ნოდარ ხადური განაგრძობს ორმხრივ შეხვედრებს ვაშინგტონში.
საერთაშორისო სავალუტო ფონდის აღმასრულებელ დირექტორთან, ამერიკის შეერთებული შტატებიდან მეგ ლუნდსაგერთან გამართულ შეხვედრაზე ფინანსთა მინისტრმა და ქართულმა დელეგაციამ საქართველოში არსებული მდგომარეობა განიხილეს.
ფინანსთა სამინისტროს ცნობით, ისაუბრეს იმ ნაბიჯების გადადგმის აუცილებლობაზე, რომელიც ქვეყნის განვითარებისა და რეფორმების გასაგრძელებლად არის საჭირო.
საქართველოში საპენსიო რეფორმისა და ფასიანი ქაღალდების განვითარების პერსპექტივაზე ისაუბრეს ფინანსთა მინისტრმა, ნოდარ ხადურმა და მსოფლიო ბანკისა და საერთაშორისო საფინანსო კორპორაციის კაპიტალური ბაზრებისა და არასაბანკო საფინანსო დაწესებულებების (საპენსიო ფონდების) დეპარტამენტის დირექტორმა, ლუკ შიქემ (Loic Chiquier) ქ. ვაშინგტონში გამართული შეხვედრის დროს.
„შედგა საინტერესო შეხვედრა. ფინანსთა სამინისტრო ეკონომიკისა და მდგრადი განვითარების სამინისტროსთან ერთად აქტიურად მუშაობს საპენსიო რეფორმის საკითხებზე. სამწუხაროდ ქვეყანაში დღემდე არ გვაქვს ევროპული სტანდარტების საპენსიო სისტემა. ჩვენ უნდა გადავიდეთ დაგროვებით საპენსიო სისტემაზე და დღეს ვისაუბრეთ სწორედ იმაზე, თუ როგორ შეიძლება დაგვეხმაროს რეფორმის განხორციელებაში მსოფლიო ბანკი, როგორც რჩევებით, ისე ადამიანური რესურსებით, რათა ეს პროცესი შეძლებისდაგვარად მოკლე ვადაში დასრულდეს,” – განაცხადა ფინანსთა მინისტრმა ნოდარ ხადურმა.
დღესვე, ფინანსთა მინისტრმა, ნოდარ ხადურმა შეხვედრა გამართა IFC-ის საზოგადოებრივი და კერძო სექტორების პარტნიორობის დეპარტამენტის დირექტორთან ლორენს კარტერთან (laurence Carter).
შეხვედრის მთავარი თემა ფასიანი ქაღალდების ბაზრის განვითარება და კერძო და საჯარო სექტორების თანამშრომლობის საკითხები იყო.
როგორც შეხვედრაზე აღინიშნა, მთავარია სახელმწიფოს მონაწილეობა ბიზნესის განვითარებაში იყოს დაბალანსებული, რათა დაცული იყოს, როგორც სახელმწიფოს, ისე ბიზნესის ინტერესები.
„ვფიქრობ, საჯარო და კერძო სექტორების პარტნიორობის მიმართულებით მნიშვნელოვანი პროექტების განხორციელებაა შესაძლებელი, განსაკუთრებით ენერგეტიკისა და ჯანდაცვის სფეროებში,” – განაცხადა ფინანსთა მინისტრმა, ნოდარ ხადურმა.
11.10.13
