ყველაფერი ერთი უბრალო ვარსკვლავით დაიწყო.
შემდეგ ბევრი შრომით, მონდომებით და გათენებული ღამეებით გაგრძელდა.
დღეს კი მხატვარ ძმებ ვალეტოვებს ბევრი იცნობს, განსაკუთრებით სოციალური ქსელის მომხმარებლები, რომელსაც ერთხელ მაინც თვალში მოხვდებოდათ მათი გვერდი და ის საოცარი ნახატები, რომელსაც თვითნასწავლი ფერმწერები საკმაოდ მოკლე დროში ქმნიან. ანზორი და თემო ბათუმიდან არიან, მხატვრობით გატაცება ოჯახურ მემკვიდრეობად ერგოთ, მხატვარი მამისგან შეიყვარეს საღებავების სუნი და ტილოზე გადატანილი სიფერადე. შემდეგ თვითონაც სცადეს ბედი და დღეს ამ საქმის გარეშე საკუთარი თავი არცერთ მათგანს არ წარმოუდგენია.
ცნობილი თუ უცნობი ადამიანების პორტრეტებს ძმები ვალეტოვები შეკვეთით ხატავენ და თითოეულ მათგანში დიდ ემოციას და გრძნობას დებენ, რადგან მიაჩნიათ, რომ ხელოვნება მართალი საქმეა და არ შეიძლება ტილოზე რამე ყალბი ან ხელოვნური იყოს.
საკუთარი სტილი აქვთ, რეალისტურ პორტრეტებს ძირითადად შავ-თეთრი ტონალობებით აცოცხლებენ და ნატურის ხასიათს განსაკუთრებით გამოკვეთავენ. მოდილიანის არ იყოს, მიაჩნიათ, რომ თვალები სულის სარკეა, სულში ჩაწვდომა კი რეალისტური ნახატის შესაქმნელად აუცილებელი წინაპირობაა.
მე თუ მკითხავთ ეს ენერგიული და პერსპექტიული ძმები, რომლებიც განვითარებას და ტექნიკის დახვეწას სამხატვრო აკადემიაში სწავლით ცდილობენ, სულის მხატვრები არიან. ტილოზე ადამიანების გაცოცხლება კი ნამდვილად, რომ სულაც არაა ადვილი საქმე.
რას ნიშნავს მხატვრობა მათთვის და როგორი სამუშაო გარემო სჭირდებათ ყველაზე ცოცხალი ნახატების დასახატად, ამაზე „თბილისი თაიმსს“ მხატვარი ძმები ანზორ და თემო ვალეტოვები ესაუბრნენ.
ანზორი :
-პირველ რიგში მინდა დიდი მადლობა გადაგიხადოთ იმისთვის, რომ დაინტერესდით ხელოვნებით და ჩვენი შემოქმედებით. თვითნასწავლი მხატვრები გახლავართ და სწორედ ხატვა იქცა ჩვენი ცხოვრების განუყოფელ ნაწილად, ისევე როგორც პროფესიად.
ხატვა თამამად შეგვიძლია ვთქვათ რომ მემკვიდრეობით გვერგო, მაგრამ ის, საითკენაც ახლა მივდივართ და საიდანაც აქამდე მოვედით, დიდი შრომის შედეგია. მამა მხატვარია, ბავშვობაში პირველად თემომ სცადა ვარსკვლავი დაეხატა და სწორედ მისი ხატვის ტექნიკით აღფრთოვანებულმა გაგვიზიარა ეს ნამუშევარი. პირველი ინტერესი სწორედ აქედან გაჩნდა.
ზოგადად რთული ვერ შეიძლება იყოს ის, რაც გიყვარს. მოდილიანმა არა ბუნება, არამედ სული დაინახა. ნახატი, რომელშიც სული დევს იშვიათია და განუმეორებელი ეგზემპლარია ნამდვილად. ჩვენ ვხედავთ ადამიანების ბუნებასა და ხასიათს, როდესაც ვიღებთ შეკვეთებს და ვცდილობთ მთელი გრძნობით ფურცელზე გადავიტანოთ. სიმბოლურ დატვირთვას რაც შეეხება, ეს საზოგადოების მოთხოვნებიდან უფრო მეტად გამომდინარეობს, რადგან პორტრეტის ჟანრი ძალიან პოპულარულია და ბევრს სურს საკუთარი ან ახლობელი ადამიანის ნახატი ჰქონდეს.
რით განვსხვავდებით სხვა ხელოვანებისგან და რა არის ჩვენი ნიშა? ალბათ, სწორედ ის რომ არც არასდროს ვედრებით სხვებს და მათ შემოქმედებას. მიგვაჩნია, განსხვავება შედარებითია, არსებობს კარგი და ცუდი ნახატი, მაგრამ არ არსებობს ცუდი მხატვარი. ხატავენ პროფესიონალურად, ხატავენ სულით და არსებობს მხატვრები, რომლებიც ამ ორ დიდ შთაგონებას ერთმანეთს უკავშირებენ. ხალხს კი მივანდოთ იმის არჩევას, რომელს მივეკუთვნებით ჩვენ.
თემო :
-სოციალურმა ქსელმა დიდი როლი ითამაშა და თამაშობს ჩვენი ნამუშევრების პოპულარიზაციის საქმეში. მართლაც რომ ძალიან გვეხმარება ჩვენი ნამუშევრების საზოგადოებისთვის გაცნობასა და რეკლამირებაში, როგორც Facebook-ი, ასევე Instagram, flicker-ი, LinkedIn-ი, YouTube-ი და სხვა მრავალი. ამაჟამად ჩვენს ორ PR მენეჯერთან ერთად ვცდილობთ დავხვეწოთ ჩვენი გვერდები და მომსახურება და მუდმივი სიახლეები შევთავაზოთ ჩვენი გვერდების მომხმარებლებს.
რას ნიშნავს მხატვრობა ჩვენთვის? ეს სულის ამოძახილია, გონებისა და სულის თავისუფლებაა, სხვა სამყაროა, რომელიც ჩვენს ნახატებში გამოჩნდება, ნახატებში, რომელიც ჯერჯერობით მხოლოდ ერთეულებმა იცის.
არ ვფიქრობთ და არც გვინატრია როდესმე, რომელიმე კონკრეტულ მხატვარი ვყოფილიყავით, მოგვწონს ის ვინც ახლა ვართ. რაც შეეხება მიმდინარეობას, როგორც უკვე აღვნიშნეთ, ჩვენს გამოფენაზე იხილავთ ამას უფრო დეტალურად.
როგორია ჩვენი სამუშაო გარემო? მას ხშირად ხედავს ჩვენი გვერდის მომხმარებლები. ოთახი სადაც ყველგან ნახატებია, საჭირო განათება, გემოვნებიანი მუსიკა და კომფორტი, რომელიც სხისთვის შეიძლება ქაოსად ჩაითვალოს- ეს ჩვენი გარემოა…
ძმები კარგი მეგობრები და კოლეგები ვართ. ერთმანეთს ხშირად ვუზიარებთ ჩვენს აზრებს და ყოველთვის ვითვალისწინებთ იმას, რასაც მამა გვირჩევს. სწორედ ამის დამსახურებაა ის, რომ როდესაც ჩვენს წინა წლების ნახატებს გადავხედავთ რადიკალური განსხვავება იგრძნობა და უფრო და უფრო ვვითარდებით ტექნიკურად.
სამომავლო გეგმები ბევრი და მრავალფეროვანია, ეს კი ერთერთი რამ იქნება, რასაც საიდუმლოდ დავტოვებთ და მალევე სიურპრიზის სახით შევთავაზებთ საზოგადოებას“.
ავტორი: ანა ურუშაძე