2008 წელს ხურჩაში ტერაქტის მოწყობაში ბრალდებულებს მალხაზ მურღულიასა და რომან შამათავას თბილისის საქალაქო სასამართლომ პატიმრობა შეუფარდა.
მოსამართლემ აღნიშნული გადაწყვეტილებით დააკმაყოფილა ბრალდების მხარის შუამდგომლობა დაკავებულების პატიმრობასთან დაკავშირებით. დღევანდელ პროცესზე დაცვის მხარის ადვოკატები ითხოვდნენ, რომ ბრალდებულებისთვის აღმკვეთი ღონისძიების არც ერთი სახე არ ყოფილიყო გამოყენებული, ალტერნატივად კი ადვოკატები მურღულიას შემთხვევაში 3000 ლარიან, ხოლო შამათავას შემთხვევაში, 5000-ლარიანი გირაოს სანაცვლოდ გათავისუფლებას მოითხოვდნენ.
დღევანდელ პროცესზე, პროკურატურის მხრიდან განიმარტა ის არგუმენტი, რის გამოც, პატიმრობა უნდა შეეფარდებინათ ბრალდებულებისთვის.
პროკურორმა გიორგი კავსაძემ დღევანდელ პროცესზე აღნიშნა, რომ არსებობს დანაშაულის ჩადენის, ასევე მიმალვისა და მტკიცებულებების მოპოვებაში ხელიშეშლის საფრთხე ბრალდებულებისთვის არასაპატიმრო აღმკვეთი ღონისძიების პირობებში.
დაცვის მხარის ადვოკატებმა პროკურატურის აღნიშნულ განცხადებაზე საპასუხოდ განმარტეს, რომ არც ერთი ბრალდებული არ აპირებდა მიმალვას.
“მალხაზ მურღულია სამეგრელოდან ჩამოიყვანა სამეგრელოს სუს-ის უფროსმა “უზბეკამ” და როდესაც გავიგეთ, რომ მურღულია დაკითხვაზე მოჰყავდათ ჩვენ მას დავახვედრეთ ე.წ.მოდულთან ადვოკატი. “უზბეკამ” მურღულიას უთხრა, რომ იმ დღეს არ დაიკითხებოდა. მურღულია მეორე დღეს თავისი ნებით, ისე, რომ არც ყოფილა დაბარებული, მაინც გამოცხადდა მოდულის შენობასთან ადვოკატთან ერთად, თუმცა ის მაინც არ დაიკითხა და მხოლოდ მესამე დღეს დაიკითხა. მას რომ მიმალვა სდომოდა, იგი ამ პერიოდს გამოიყენებდა”, – განმარტეს დაცვის მხარის ადვოკატებმა გოგა ონიანმა და რომეო საჯაიამ.
ადვოკატები აცხადებენ, რომ საქმეში ბევრი შეუსაბამობა არსებობს. კერძოდ, გოგა ონიანის განცხადებით, ე.წ. ხურჩის აფეთქების საქმეში 5 მოქმედი სუს-ელი საკუთარ მონაწილეობას აღიარებს, თუმცა მათ მიმართ პასუხისმგებლობის საკითხი არ დამდგარა. ადვოკატის აღნიშნულ განცხადებას გამოეხმაურა ერთ-ერთი ბრალდებული რომან შამათავა, რომელმაც აღნიშნა, რომ მისთვის გასაკვირია, როდესაც შს სამინისტროს მოქმედი თანამშრომლები აღიარებენ მონაწილეობას და ისინი თავისუფლებაში იმყოფებიან, ხოლო თავად და მალხაზ მურღულია ბრალს არ აღიარებენ და დააკავეს.
ამასთან, ორივე ბრალდებული წარდგენილ ბრალდებას, რომელიც ტერაქტის მოწყობას გულისხმობს, კატეგორიულად უარყოფს.
დღევანდელ პროცესზე, ადვოკატმა რომეო საჯაიამ აღნიშნულ საქმეს “ისტორიული საქმე” უწოდა და თანაც სასამართლოს მიმართა, რომ თუკი აღნიშნულ საქმეზე მისი დაცვის ქვეშ მყოფებს პატიმრობა შეეფარდებოდათ, ეს ქვეყნის სირცხვილიც იყო, რადგან გარკვეულწილად იმის აღიარებას ნიშნავდა, რომ ხურჩაში მომხდარი აფეთქება არა რუსებმა, არამედ ქართველებმა მოაწყვეს.
რომეო საჯაის თქმით, მას მიაწოდეს ინფორმაცია, რომ არსებობს ვიდეოჩანაწერი, რომლითაც დასტურდება, რომ ხურჩაში სროლები აფხაზეთის ე.წ. საზღვრიდან, ნაბაკევიდან ხდებოდა.
ადვოკატმა პროცესზე განაცხადა, რომ როდესაც პროცესის არსებითი განხილვა დაიწყება, დადასტურდება, რომ გამოძიება, რომელიც ერთი კვირის წინ დაიწყო, ემსახურება პოლიტიკურ კალენდარს და წინასაარჩევნოდ გარკვეული პროცენტული მაჩვენებლით ხმების მოპოვებას.
ადვოკატმა აღნიშნა, რომ დაკავებული მურღულია არის ჯარისკაცი, რომელიც ემსახურებოდა საკუთარ ქვეყანას და მის მიმართ პატიმრობის გამოყენება იმას ნიშნავს, რომ იგი შერცხვება როგორც საკუთარი შვილების წინაშე, ასევე სახელი გაუტყდება მის ოჯახს, რაც უსამართლობაა.
ამასთან, დღევანდელ პროცესზე ადვოკატებმა მალხაზ მურღულიას ჯანმრთელობის მძიმე მდგომარეობის დამადასტურებელი დოკუმენტიც წარადგინეს, თუმცა ბრალდების მხარის პროკურორებმა აღნიშნეს, რომ აღნიშნული დოკუმენტი პროცესუალური დარღვევით არის მოპოვებული.
ხურჩაში მომხდარი აფეთქების საქმეზე ბრალი რომან შამათავასა და მალხაზ მურღულიას ე.წ. მოდულის შენობაში გუშინ წაუყენეს. აღმკვეთი ღონისძიების შეფარდების შემდეგ ისინი სასჯელაღსრულების დაწესებულებაში იქნებიან გადაყვნილები.
მათ საქმეზე წინასასამართლო სხდომა 11 დეკემბერს 12:00 საათზე ჩაინიშნა.
24.10.13
