ბავშვებზე რომ აღარაფერი ვთქვათ, უფროს ადამიანებსაც კი განსაკუთრებულად სიამოვნებთ, როდესაც საკუთარი ხელით ქმნიან. ჩვენი პატარა მეგობრებისთვის კი ეს პროცესი კიდევ უფრო მეტად სასიამოვნო და სახალისოა. ამ შემთხვევაში, პატარებს აქვთ შესაძლებლობა, თითებით ქსოვის ვორქშოპში მიიღონ მონაწილეობა.
ვორქშოპი ჩატარდება „თამაშობანას“ საოჯახო კაფეში, სადაც ყოველ პარასკევს, შაბათსა და კვირას საინტერესო, საგანმანათლებლო და გასართობი ღონისძიებები იმართება.
კომპანია “თამაშობანა” 2015 წლიდან აწარმოებს ქართულ თამაშებს და იღვწის თამაშის, როგორც ბავშვთა განვითარების, ნებისყოფის ჩამოყალიბებისა და დაბრკოლებების გადალახვის უნარის ჩამოყალიბების საუკეთესო საშუალების პოპულარიზაციისკენ. თითებით ქსოვა კი ის პროცესია, რომელიც დიდი ცნობადობით არ გამოირჩევა, თუმცა განსაკუთრებულად საინტერესო ხელოვნებაა.
რას ითვალისწინებს აღნიშნული აქტივობა და რას სთავაზობს ის მონაწილეებს? „თბილისი თაიმსს“ შესაბამისი ინფორმაცია ნაუ სონღულაშვილმა, „თამაშობანას“ თანადამფუძნებელმა მიაწოდა.
როდის და რას გეგმავთ?
ტრადიციულად, ყოველი კვირის ბოლოს „თამაშობანაში“ სხვადასხვა გასართობი და განსატვირთი ღონისძიება ტარდება. ამ პარასკევს ბავშვები საკუთარი თითებით მოქსოვენ ფერად რვაფეხებს, რომლებიც მათი საყვარელი სათამაშო გახდება.
რაზეა ორიენტირებული შესაბამისი ვორქშოპი?
აღნიშნული პროცესი, გარკვეულწილად, თერაპიულია, ვინაიდან მოიცავს შეხებას ბუნებრივ მასალებთან და, ასევე, ხელს უწყობს შემოქმედებითი აზროვნებისა და წვრილი მოტორიკის განვითარებას
ვის შეუძლია მონაწილეობის მიღება?
მონაწილეობის მიღება შეუძლიათ 6-10 წლის ასაკის ბავშვებს, თუმცა ხშირად მშობლებიც სიამოვნებით ერთვებიან ხოლმე ჩვენს აქტივობებში, რაც ბავშვებისთვის ძალიან წამახალისებელია. სწორედ ერთად, ხარისხიანად გატარებული დრო შემეცნებით თუ სხვადასხვა გასართობ აქტივობებში, მშობლებისა და შვილების ურთიერთობას კიდევ უფრო ამყარებს და ათბობს.
ავტორი: მარიამ ტიელიძე
