პირველი საუნივერსიტეტო კლინიკის დირექტორი ლევან რატიანი განმარტავს, თუ რა იწვევს კორონავირუსით ინფიცირებული პაციენტების მდგომარეობის გართულებას.
რატიანის თქმით, გააჩნია ორგანიზმს, თუ როგორ ფიზიოლოგიურ პირობებში იმყოფება და რა სომატური დაავადებები გააჩნია.
რატიანი კიდევ ერთხელ განმარტავს, რომ კორონავირუსით შეიძლება დაავადდეს ნებისმიერი, ვინც სოციალურ დისტანციას არ დაიცავს.
„კოვინფექცია გახლავთ ინფექციის ერთ-ერთი სახე, რომელმაც შეიძლება გამოიწვიოს ნებისმიერი ადამიანის დასნებოვნება იმ პირობებში, თუ არ დავიცავთ იმ წესებს, რომელიც მოწოდებულია მსოფლიო ჯანდაცვის ორგანიზაციის მიერ. აღნიშნულიდან გამომდინარე, პირველი საპრევენციო ღონისძიება როგორც ჩვენს ქვეყანაში, ისე მსოფლიო ჯანდაცვის ორგანიზაციის რეკომენდაციით არის რაც შეიძლება მეტი სოციალური დისტანცირება. რამ შეიძლება გამოიწვიოს პაციენტის დამძიმება და ა.შ. გითხარით, რომ ინფექციურ პათოლოგიებს ახასიათებს ორი რამ – პირველი, ყველა ვართ მიმღები, მაგრამ არ ვართ ყველა დაავადებულები. გააჩნია ორგანიზმის სტატუსს, თუ როგორ ფიზიოლოგიურ პირობებში ვართ და რა სომატური დაავადებები გაგვაჩნია, რომ დაავადება გაღრმავდეს ან დაიბლოკოს“ , – განაცხადა ლევან რატიანმა.
კითხვაზე, თუ რა გახდა საუნივერსიტეტო კლინიკაში მოთავსებული პაციენტების დამძიმების მიზეზი, რატიანმა უპასუხა, რომ მიზეზი არის თავად ორგანიზმი და არა ჰოსპიტალიზაციის დაყოვნება.
„არც ერთი პაციენტის დამძიმების მიზეზი არ გამხდარა ჰოსპიტალიზაციის დაყოვნება, დამძიმების მიზეზს ამ შემთხვევაში წარმოადგენს თვითონ ორგანიზმი“ , – აღნიშნა რატიანმა.
ამ ეტაპზე კლინიკაში სულ 55 ინფიცირებული იმყოფება, მათგან ორი ახალი შემთხვევაა.
პაციენტებიდან 33-ს მწვავე პნევმონია აღენიშნება.
რატიანის განმარტებით, რეანიამციაში რჩება შვიდი პაციენტი, ხოლო სხვა დანარჩენი პაციენტების მდგომარეობა სტაბილურია.
„რეანიმაციულ განყოფილებაში შვიდი პაციენტი იმყოფება. მათგან სამი არის ფილტვის ხელოვნურ ვენტილაციაზე, დანარჩენის მდგომარეობა სტაბილურია, არიან ოქსიგენ დამოკიდებული და აგრძელებნ სიმპტომურ მკურნალობას. ასევე იცით, რომ გვყავს სამი მოზარდი, მათი მდგომარეობა ამ ეტაპამდე სტაბილურია, არანაირ სიმპტომურ ჩარევას არ საჭიროებენ.
რაც შეეხება ორსულებს, 24 კვირის ორსულის, როგორც ნაყოფის ისე ქალის მდგომაროება სტაბილურია და შეესაბამება ფიზიოლოგიურ პარამეტებს. უკვე 9 კვირის ორსულის და ნაყოფის მდგომარეობაც ამ ეტაპამდე ფიზიოლოგიურ პირობებშია“ , – განაცხადა რატიანმა.