პანდემიასთან ბრძოლამ, მსოფლიო მასშტაბით, არაერთი პრობლემა წარმოშვა. არსებულ რეალობაში, უმთავრესი პრიორიტეტი ადამიანის სიცოცხლე და ჯანმრთელობაა. საქართველოში მოსახლეობამ, აკრძალვების კვალდაკვალ, სხვადასხვა სოციალური შეღავათი მიიღო. რა ნაბიჯები გადადგა საქართველოს ხელისუფლებამ იმისთვის, რომ მოქალაქეებისთვის გარკვეული შეღავათები გაეწია? კიდევ რა იგეგმება სამომავლოდ? აღნიშნულ შეკითხვებს „თბილისი თაიმსთან“ საუბრისას ანალიტიკოსი ამირან სალუქვაძე პასუხობს.
ზოგადად, რა ტიპის შეღავათები დააწესა საქართველოს მთავრობამ ქვეყნის მოსახლეობის მიმართ?
რამდენადაც ვიცით, საგანგებო მდგომარეობის გამოცხადებიდან 20 დღეა გასული. მთავრობამ პირველ ეტაპზე გამოაცხადა ეკონომიკური ანტიკრიზისული ღონისძიებები, 4 თვით გადაავადა ქონებისა და საშემოსავლო გადასახადი, რაც 18 ათას მეწარმეს შეეხო. ასევე, დაგეგმილთან შედარებით, “დღგ”-ს დაბრუნების პროგრამით გათვალისწინებული 600 მილიონი გაორმაგდა. მეორე ეტაპზე მთავრობამ, დაახლოებით, 1,2 მილიონი აბონენტისთვის კომუნალური გადასახადების სუბსიდირება მოახდინა, რაც ამ ეტაპისთვოს მნიშვნელოვანი გადაწყვეტილება იყო.
როგორც პრემიერმა განაცხადა, მთავრობა აგრძელებს ანტიკრიზისულ გეგმაზე მუშაობას. უნდა დაველოდოთ შემდგომ გადაწყვეტილებებს. დღეს ძალიან ბევრი ადამიანი საჭიროებს დახმარებას.
ამ მხრივ, ხელისუფლებამ მაქსიმუმი გააკეთა მსგავს კრიზისულ ვითარებაში?
ჩემი მხრიდან რთულია შეფასება. ყველამ ვიცით, რომ ჩვენი ქვეყნის შესაძლებლობები შეზღუდულია. ამას ემატება ის, რომ წელს ბიუჯეტის საშემოსავლო ნაწილში სერიოზული გარღვევა იქნება. პროგნოზს ვერ ეკონომისტები, ვერც მთავრობა აკეთებს. ამიტომ კონკრეტული შეფასებების გაკეთება მოკლებული იქნება რეალურ გათვლებს. ვფიქრობ, ცდილობენ მაქსიმუმის გაკეთებას. ბიუჯეტისთვის კომუნალური გადასახადებიც არაა პატარა თანხა. ჩემი ვარაუდით, ეს აქცია ბიუჯეტს 200-400 მილიონის ფარგლებში დაუჯდა.
ქართული რეალობა სხვა ქვეყნების ვითარებას რომ შევადაროთ, როგორ შეაფასებთ შესაბამის შეღავათებს?
სხვადასხვა გამოცდილებაა. ბევრი ქვეყანა, მათ შორის, წამყვანი ეკონომიკები არაფერს ანაზღაურებენ. ზოგან მკურნალობაც კი ფასიანია. ამიტომ, სხვისი მაგალითები არ გამოგვადგება. ველოდები მთავრობის ანტიკრიზისული გეგმის მესამე ეტაპს. დიდი ალბათობით, მოსახლეობის გარკვეული ფენების დახმარება მოხდება. ხალხიც უნდა დავეხმაროთ საკუთარ თავს. რაც უკეთ დავიცავთ მოთხოვნებს, მალე გამოვალთ თვითიზოლაციიდან და დავუბრუნდებით ჩვენს საქმიანობას. ამავე დროს, ძალიან მნიშვნელოვანია სოლიდარობა, რის მაგალითსაც ვხედავთ. უკვე stopcov.ge-ზე 124 მლნ ლარზე მეტია აკუმულირებული. ეს თანხაც მიმართული იქნება კრიზისის დაძლევასა და სოციალურ მიმართულებაზე.
ავტორი: მარიამ ტიელიძე