გიორგი გახარიამ ანტიკრიზისული ეკონომიკური გეგმის პრეზენტაციაზე ე.წ. ზრუნვის პაკეტი წარმოადგინა. პრემიერ-მინისტრმა აღნიშნა, რომ ეს არის მინიმუმი, რომელიც ჩვენი ეკონომიკის შესაბამისია და რაც გამომდინარეობს ეკონომიკის სიმცირიდან.
კერძოდ, დაქირავებით დასაქმებულები, რომლებმაც დაკარგეს სამსახური ან გაუშვეს უხელფასო შვებულებაში, დახმარების სახით 6 თვის განმავლობაში 1200 ლარს, თვეში 200 ლარს მიიღებენ. ამ დახმარებით სარგებლობას დაახლოებით 350 000 მოქალაქე შეძლებს.
საქართველოში კორონავირუსი 431 ადამიანს დაუდასტურდა, აქედან 114 უკვე გამოჯანმრთელდა, 5 კი გარდაიცვალა. საქართველოს კიდევ 3 მოქალაქეს კორონავირუსი სხვა ქვეყნებში დაუდასტურდა და ისინი საქართველოში გადმოიყვანეს.
