დიზაინერებისა და ხელნაკეთი ნივთების მწარმოებლებისთვის დღეს ახალი გამოწვევაა, უფრო სწორედ, ეს გამოწვევა ახლა განსაკუთრებულად აქტუალურია – ახალგაზრდებს ძალიან მოსწონს ჯინსის მოხატული ქურთუკები. როგორც წესი, ამ შემთხვევაში ისინი ცდილობენ, მოირგონ ჯინსები იმ დიზაინით, რომელიც მათ ხასიათსა და მათ უმთავრეს განწყობებს უსვამს ხაზს.
დღეს უკვე არაერთი მხატვარია ამ სფეროს აქტიური წარმომადგენელი. საზოგადოების მოთხოვნის პარალელურად, იზრდება ხელოვანი ადამიანების ინტერესი და საინტერესოს შექმნის სურვილი. სხვადასხვა ნივთის მწარმოებლებმა თუ იდეების განმახორციელებლებმა თავიანთ საქმიანობას მოხატული ქურთუკების ხაზიც დაურთეს. დღესდღეობით უკვე ბევრს ვნახავთ ამ მიმართულებით დასაქმებულს.
ერთ-ერთი ბიზნესი, რომელიც პირველ ნაბიჯებს დგამს ამ კუთხით, Adelante-ა. საკუთარ გეგმებსა და ინტერესებზე „თბილისი თაიმსს“ მისი დამფუძნებელი, ელენე ტურიაშვილი ესაუბრა.
Adelante-ხელნაკეთი ქმნის ხელნაკეთ ნივთებს. გუნდის წევრები მუშაობენ პოლიმერული თიხით, ქმნიან ხის აქსესუარებს და ხატავენ ქურთუკებზე, მაისურებზე და კიდევ უამრავი შესაძლებლობა აქვთ, რასაც ეტაპობრივად დაამატებენ. ისინი მუშაობისა და განახლების მუდმივ პროცესში არიან.
ჯინსის მოხატული ქურთუკებით ბევრი ინტერესდება?
დიახ, მოთხოვნიდან გამომდინარე დავიწყეთ ამ მიმართულებით მუშაობა და საკმაოდ საინტერესო და სასიამოვნო პროცესია.
ამ მხრივ, რა გეგმები გაქვთ?
ვფიქრობთ, საინტერესო წამოწყებაა და უამრავი იდეა შეიძლება, გაჩნდეს. მუშაობის პროცესი საოცრად მშვენიერია და შედეგი – კიდევ უკეთესი. ბედნიერებაა კმაყოფილი მომხმარებელი და აუცილებლად განვავითარებთ
როგორი დიზაინია მეტად მოთხოვნადი?
მარტივი და დახვეწილი. ჩვენი კვლევიდან გამომდინარე, მომხმარებელი ირჩევს მარტივსა და სადას
როგორ ფიქრობთ, რის მიხედვით დაამზადებთ მათ სამომავლოდ?
პირველ ყოვლისა, მომხმარებლის აზრის გათვალისწინებით. ჩვენი მიზანია, პროდუქტი შევქმნათ ყველასთვის. იყოს ასაკზე მორგებული და საინტერესო.
ავტორი: მარიამ ტიელიძე
