ვინ იქნება მომავალი პრემიერი?

საქართველოში საპრეზიდენტო არჩევნები 2013 შედგა, მაშასადამე ქვეყანას ახალი პრეზიდენტი ეყოლება და პრემიერ ბიძინა ივანიშვილის პირობისამებრ არა მხოლოდ პრეზიდენტი, არამედ პრემიერ-მინისტრიც.

2012 წლის 1 ოქტომბრის საპარლამენტო არჩევნების შემდეგ საქართველოს ხელისუფლებაში ბიძინა ივანიშვილის თავმჯდომარეობით კოალიცია ,,ქართული ოცნება“ მოვიდა. 25 ოქტომბერს ახლადარჩეული პარლამენტის მეორე პლენარულ სხდომაზე პრემიერ-მინისტრის ბიძინა ივანიშვილის ხელმძღვანელობით ახალ მთავრობას 88 დეპუტატმა დაუჭირა მხარი, ხოლო 54-მა დეპუტატმა ნაციონალური მოძრაობიდან წინააღმდეგ მისცა ხმა.

ბიძინა ივანიშვილის ქართულ პოლიტიკაში გამოჩენის შემდეგ მან არაერთხელ დადო პირობა, რომ ის დატოვებდა პრემიერის პოსტს და ქვეყნის განვითარებას არასამთავრობო სექტორიდან ადევნებდა თვალყურს. როგორც თავად პრემიერის გუნდიდან და ქართული პრესიდან ვრცელდება ინფორმაცია ძრითადად სამი კანდიდატი მოიაზრება პრემიერის პოსტზე, ესენია: ირაკლი ღარიბაშვილი, გიორგი კვირიკაშვილი, დავით სერგეენკო.

საინფორმაციო სააგენტო ,,თბილისი თაიმსმა“ ჩაატარა მცირე კვლევა შემდეგი კითხვით: ,,ვის ისურვებდით საქართველოს მომავალ პრემიერ მინისტრად? ბიძინა ივანიშვილის წასვლის შემდგომ.“ ჩვენს მიერ წარმოდგენილი კანდიდატები მეტად მრავალფეროვანია და საკმაოდ მოულოდნელი შედეგიც დაფიქსირდა, რადგან ჩვენს მიერ წარმოდგენილი კითხვის სათავეში მყოფი და პრესაში გავრცელებული სავარაუდო კანდიდატები სრულიად განსხვავდება ერთმანეთისგან.

მაშ ასე, სიის სათავეშია ქართველი ბიზნესმენი ლევან ვასაძე, რომელიც ბოლო დროს საზოგადოებაში დიდი პოპულარობით სარგებლობს თითქმის ყველა ასაკობრივ კატეგორიაში. მან გამოკითხულთა 24% მხარდაჭერა მიიღო და სიის სათავეში დიდი უპირატესობით მოექცა. მეორე ადგილზე კი საქართველოს თავდაცვის მინისტრი ირაკლი ალასანიაა, რომლის გარშემოც ბოლო დროს მეტად რთული პროცესები მიმდინარეობდა, ის პრემიერ ივანიშვილის გუნდში თავდაპირველად ვიცე პრემიერის პოსტსაც იკავებდა თუმცა მოულოდნელად ეს პოსტი პრემიერმა გიორგი მარგველაშვილს გადააბარა. როგორც ხედავთ ირაკლი ალასანია კვლავ დიდი პოპულარობით და საზოგადოების მხარდაჭერით სარგებლობს, მას 20%-იანი მაჩვენებლი და მეორე ადგილი აქვს ჩვენს სიაში. მესამე ადგილზე კი საქართველოს შინაგან საქმეთა მინისტრი ირაკლი ღარიბაშვილია, რომლის ეს შედეგიც მოულოდნელი არ უნდა იყოს, ვინაიდან ის ერთ-ერთ წარმატებულ უწყებას ხელმძღვანელობს, მას ჩვენს სიაში 14%-ით მესამე ადგილი უკავია, რომლის გვერდით ასევე 14%-ით და თითქმის ერთი ხმის ჩამორჩენით მიხეილ სააკაშვილია. რაც შეეხება დანარჩენ ადგილებს ჩვენს მიერ შემოთავაზებულ დიაგრამაზე შეგიძლიათ გაეცნოთ.

პრემიერ-მინისტრი თავის რჩეულ კანდიდატს პრემიერის პოსტზე შაბათს დაასახელებს, დაემთხვევა თუ არა ,,თბილისი თაიმსის“ მოწინავე სამეული და ამჟამინდელი პრემიერის არჩევანი ამას მალე შევიტყობთ.

29.10.13

გიორგი ჩუბინიძე