ერთი და იმავე მიზნებსა და დანიშნულებაზე ორიენტირებული სხვადასხვა, არაერთი ბიზნესი არსებობს. კონკურენციის პირობებში, მნიშვნელოვანია და სასიცოცხლოდ აუცილებელიც კია, ერთი განსხვავდებოდეს მეორისგან. რაც უფრო საინტერესო და მრავალფეროვანია ბიზნესი, მეტად მოთხოვნადია ის.
„შიკრიკი“ მიტანის სერვისია. თუმცა, ის განსხვავდება. განსხვავდება იმით, რომ მას განსაკუთრებული კომუნიკაცია აქვს მომხმარებლებთან. ცხადია, მას აქვს საკუთარი ისტორია. სწორედ ამ ისტორიის, დაარსების გარემოებებისა და მიზეზების შესახებ ესაუბრა „თბილისი თაიმსს“ კომპანიის თანადამფუძნებელი და დირექტორი, ირაკლი ბურჭულაძე.
რამდენი ხანია, რაც „შიკრიკი“ არსებობს და რა მიზნით დაარსდა ის?
კომპანია დაარსდა, დაახლოებით, რვა თვის წინ. მისი დაარსების იდეა იყო შემდეგი – ჩვენ გვაქვს ტექნიკის ონლაინმაღაზია. ჩვენ მიერ გაყიდული ტექნიკა ჩვენივე კურიერებს მიჰქონდათ ადგილზე. საბოლოოდ, გადავწყვიტეთ, გვეცადა და, იქნებ, სხვებსაც მოვმსახურებოდით.
ჯერ მეგობრების წრეებით შემოვიფარგლეთ – თუკი ვინმეს ლეპტოპი ან რაიმე ნივთი დარჩებოდა, ჩვენი კურიერი მოემსახურებოდა მიტანის სერვისით.
პანდემიის გამო, მოხდა ისე, რომ შეუჩერდა მუშაობა ჩვენი მფარველობის ქვეშ მყოფ ბიზნესს. მთლიანად გადავერთეთ „შიკრიკზე“ – ეს სერვისი ამ პერიოდში ყველაზე საჭირო და მოთხოვნადი გახდა. მცირე პერიოდში კომპანია საგრძნობლად გაფართოვდა. დავიმატეთ, დაახლოებით, 80 კომპანია – მიტანის სერვისის ფარგლებში. დავიწყეთ საფოსტო მომსახურება – პანდემიის დროს მზარდი მოთხოვნიდან გამომდინარე, საკურიერო კომპანიები – გარდა ერთისა – ვერ ახერხებდნენ, ამანათები 2-3 დღეზე ადრე ჩაებარებინათ. ჩვენ ეს შევძელით და ამანათები შეკვეთის დღესვე მიგვქონდა.
რატომ სახელწოდება „შიკრიკი“?
ამ სახელის დატვირთვა ყველამ ვიცით – შიკრიკი იყო ერთერთი სანდო და მებრძოლი ადამიანი, რომელიც სიცოცხლის ფასად შეძლებდა, რომ ამბავი თუ წერილი მიეტანა დანიშნულების ადგილამდე. შესაბამისად, ჩვენც გვინდოდა, ქართული ხასიათი გვეჩვენებინა.
გადავწყვიტეთ, გაგვეცოცხლებინა შიკრიკი ამ რეალობაში და თბილისის ქუჩებში ცხენებით დავიწყეთ ამანათების დარიგება.
ამ ეტაპზე, რა მიზანზე ხართ ორიენტირებული?
ჩვენი მთავარი მიზანი არის ის, რომ ვმუშაობთ აპლიკაციის შექმნაზე – ეს იქნება ქართული აპლიკაცია („გლოვოსა“ და „ვოლტის“ მსგავსი), რომელიც შეძლებს, კვების ობიექტებსაც მოემსახუროს და ეს მომსახურება გახადოს კიდევ უფრო სწრაფი.
საზაფხულო აქცია გაქვთ – ამასთან დაკავშირებით რას გვეტყვით?
ჩვენი შიდა სამზარეულო აბსოლუტურად ღიაა. შესაბამისად, გეტყვით, რომ აქცია, რომ თბილისის ყველა უბანში ამანათი სამ ლარად მიგვაქვს, კომპანიისთვის არის ზარალი. ამას ვაკეთებთ რეკლამისთვის – იმისთვის, რომ ხალხმა გაგვიცნოს, ისარგებლოს ჩვენი მომსახურებით და მიხვდეს, როგორი კომფორტულია ჩვენთან თანამშრომლობა.
აქცია გაგრძელდება ზაფხულის მანძილზე.
ავტორი: მარიამ ტიელიძე
