“ჩვენი მიზანია ნარჩენი ქაღალდის შეგროვება შემდგომი გადამუშავებისთვის”

გარემოს დაცვა, მისი მოვლა და მოფრთხილება რამდენად მნიშვნელოვანია და რა როლი აქვს მას ადამიანის ყოველდღიურობაში, პანდემიამ ეს ძალიან კარგად დაგვანახა. ყველა ვთანხმდებით, რომ მასზე ზრუნვა თითოეული ჩვენგანის თვითშეგნებიდან გამომდინარეობს. რაც უფრო მეტად ვუკვირდებით ჩვენ ელემენტარულ ქმედებებს, მის ჯანსაღია ყველაფერი ჩვენ ირგვლივ.

კომპანია “ქუერკუს” დიდი ხანი არ არის, რაც არსებობს. მას საინტერესო და სასარგებლო ამოცანები აქვს. კონკურნეციის პირობებში, მას აქვს მიზანი, აკეთოს საქმე, რომელიც ხარისხზეა ორიენტირებული. უფრო დეტალურად, “თბილისი თაიმსს” კომპანიის დამფუძნებელი, დავით სიმონიანი ესაუბრა.

რამდენი ხანია, თქვენი კომპანია არსებობს?

კომპანია „ქუერკუს“ დაარსდა 2017 წლის ბოლოს. გაფორმებულია, როგორც ინდივიდური მეწარმე.

რა მიზნებზეა ის ორიენტირებული?

ჩვენი მიზნები არის: გარემოზე ზრუნვა (ნარჩენი ქაღალდის შეგროვება შემდგომი გადამუშავებისთვის, ხეების მოჭრის პრევენცია, ხეების დარგვა, საზოგადოებაში გადამუშავების კულტურის დანერგვა და პროპაგანდა), სამუშაო ადგილების შექმნა, გადამამუშავებელი კომპანიების განვითარების ხელშეწყობა.

მუშაობისას რა ძირითად პრობლემებს აწყდებით?

არაჯანსაღი კონკურენცია. ნარჩენების მართვის ბიზნესში ვართ ახლები და, რაც მთავარია, ამ ეტაპზე ვართ მოხალისეები, ანუ ჩვენი მოგება ამ საქმიანობიდან არის 0 ლარი. ჩვენს პარტნიორ კომპანიებს მიმართავენ ყალბი შეპირებებით და ამით ცდილობენ, ჩაგვძირონ. მაგალითად, მიმართავენ ჩვენს პარტნიორებს და სთავაზობენ მუყაოსა და მინის ნარჩენების გატანას, რაც, ცხადია, ყველას მოსწონს – მხოლოდ ერთი პირობით, ჩვენთან უნდა შეწყვიტონ ურთიერთობა.

მუშაობის პრინციპი თითქმის ყველას გვაქვს ერთი – კომპანიებში იდგმება

ნარჩენების შესაგროვებელი ყუთი. შევსების შემთხვევაში, მივდივართ და ვცლით. ჩვენს შემთხვევაში ეს არის მხოლოდ მაკულატურა. თანამშრომლობის წინადადებით მივმართავთ მხოლოდ იმ კომპანიებს, რომლებიც არ არის ნარჩენების სეპარირებითა და შეგროვებით დაკავებული, ანუ თუ კომპანია უკვე თანამშრომლობს მაგ დარგში ვინმესთან, ჩვენ აღარ შევდივართ წინადადებით.

ასევე, გრანტები გაიცემა ერთსა და იმავე ან შვილობილ კომპანიებზე.

დღემდე რა ძირითად შედეგებს მიაღწიეთ?

ჩვენი შედეგები: ვთანამშრომლობთ 60 მდე კომპანიასთან (კომპანიების ჩამონათვალი http://quercus.com.ge), 60 000 კილოგრამამდე შეგროვებული მაკულატურა (ამით დაიზოგა 500-მდე ხე, 60 000-მდე კილოვატი ელექტროენერგია, 12 000 კუბური მეტრი წყალი), სოფელ ლისის ტერიტორიაზე დავრგეთ “კვიპაროზის” ჯიშის 50 ხე.

ამ ეტაპზე, კონკრეტულად რაზე მუშაობთ?

კომპანიებს ვთავაზობთ ჩვენს სერვისს – ქაღალდის ნარჩენების შეგროვება, გატანა, არქივების განადგურება.

ავტორი: მარიამ ტიელიძე