როგორც წესი, საქართველოს უნიკალური მდებარეობიდან გამომდინარე, ადამიანებს გვიწევს, გადავწყვიტოთ – მთაში დავისვენოთ თუ – ზღვაზე. ჩვენი ქვეყნის ფართობის გათვალისწინებით, გვაქვს შესაძლებლობა, მთიდან ზღვაზე დავეშვათ და – პირიქით. ასე თუ ისე, თითოეულ ჩვენგანს ერთი მეორეზე მეტად უყვარს.
რაც უნდა იყოს, ვთანხმდებით, რომ ზღვასა და მთას საკუთარი უპირატესობები აქვს და ის მახასიათებლები, რის გამოც ვირჩევთ.
ზღვაზე დასვენების 5 უპირატესობა
- იდეალური გარემო მათთვის, ვისაც ხალხმრავლობა იზიდავს – ხმაურის, გართობისა და ადამიანების მოყვარულთათვის სანაპირო საუკეთესო იდეაა. აქ აუცილებლად ნახავთ სხვადასხვა მახასიათებლის მქონე უამრავ ადამიანს.
- ვერსად ისეთ რუჯს ვერ მიიღებთ, როგორც – ზღვის სანაპიროზე, მზის სხივების ქვეშ – შეფერილი კანი ქალებსა და კაცებს თანაბრად მოსწონთ. უკვე არსებული სხვადასხვა საშუალების მიუხედავად, დასავლეთ საქართველოში წასვლა და ზღვის წყლით გარუჯვა ყველაზე კარგი არჩევანია ჯანსაღი ფერისთვის.
- დაისვენეთ ზღვაზე, თუ ზაფხული თქვენი საყვარელი სეზონია – ზაფხული ძალიან ბევრს უყვარს – კომფორტულია, როცა გრილად გაცვია და სეზონის სიმხურვალით ტკბები;
- უნდა ითქვას, რომ ზღვაზე დასვენება ბევრისთვის უფრო კომფორტულია, ვიდრე – ბუნებაში – ზოგს უყვარს, როცა ბუნებასთან თანაცხოვრობს და საყოფაცხოვრებო გამოწვევებს საკუთარი შესაძლებლობებით უმკლავდება. თუ ეს არ გიზიდავთ, მაშინ ზღვაზე უნდა დაისვენოთ, სადაც მინიმალური ჩარევა გიწევს საკუთარ ყოველდღიურობაში;
- წყალი და ცურვა სასარგებლოა ჯანმრთელობისთვის – ყველამ ვიცით, რომ ცურვა სახსრებისთვის ძალიან სასარგებლოა. ეს აქტივობა ბევრს უყვარს და მისი გახორციელების საშუალებას იძლევა წყლის უდიდესი სივრცე, რომელიც სანაპიროზე თვალწინ წარმოგვიდგება.
მთაში დასვენების 5 უპირატესობა
- აუცილებლად მთაში უნდა დაისვენოთ, თუკი გსურთ, ხმაურსა და ხალხმრავლობას განერიდოთ – ჩვეულებრივ, მთაში, ბუნებასა და სიმწვანეში მიისწრაფვიან ადამიანები, რომლებსაც სულიერი სიმშვიდე და ძალების აღდგენა სურთ. მათ აქვთ მოთხოვნილება, უბრალოდ, გაიქცნენ და თავი კლდეებსა და ბალახებს შეაფარონ;
- აქ ინტერნეტთან წვდომა ნაკლებად დასაშვებია – ბევრ ჩვენგან უთქვამს – შესაძლებელი რომ იყოს, გამოვრთავდი მობილურს, გამოვრთავდი კომპიუტერს და ინტერნეტს არ გავეკარებოდიო – მთაში თუ წახვალთ, ამ ყველაფრის დაშვება ლოგიკურ ჩარჩოებში ჩაჯდება – აქ დაისვენეთ, თუკი გსურთ, ინტერნეტსივცრეს თავი დააღწიოთ;
- ადამიანებს სხვადასხვა სეზონი გვიყვარს. ზამთარი, ერთი შეხედვით ეს მოუხერხებელი სეზონი, ბევრისთვის კომფორტის ზონაა – მთის კალთები იმის საშუალებას იძლევა, გარკვეული დროით მაინც დაიბრუნოთ ზამთრის სუსხი;
- ზღვაზე უარი უნდა თქვათ და მთას მიაშუროთ, თუკი მუზებს ეძებთ – ხედები და პეიზაჟები აქ ისეთია, ყოველ დილით სასიამოვნოდ გაოცებულები დარჩებით. რამდენჯერაც ერთ მხარეს გაიხედავთ, იმდენჯერ ახალ ემოციას აღმოაჩენთ;
- მთაში ჩაკარგვა იდეალური გამოსავალია იმ შემთხვევაში, თუ ენერგიის დახარჯვა გინდათ – აქ ყველაფრის გაკეთება თავად მოგიწევთ. საკუთარი თავი თქვენ გაბარიათ და გაქვთ შესაძლებლობა, საკუთარ თავს საკუთარ თავზე ზრუნვის სიამოვნება მიანიჭოთ.
ავტორი: მარიამ ტიელიძე
