არცთუ ისე დიდი დრო დარჩა საქართველოში რთველის დაწყებამდე. ჩვენი ქვეყანა ცნობილია მსოფლიოში მეღვინეობის კულტურითა და შესაბამისი ტრადიციებით. ის არის ერთერთი ფაქტორი, რის გამოც საქართველოს სხვადასხვა კუთხე-კუნჭულის მოსანახულებლად ისწრაფვიან. პანდემიის საუკუნეში, ამ კონკრეტულ ეტაპზე საქართველო შიდა ტურიზმის ხელშეწყობისკენ მკვეთრ ნაბიჯებს დგამ.
აქ საოჯახო მეღვინეობა განსაკუთრებულად საინტერესო და აქტუალურია. როგორ ემზადებიან მეღვინეები შემოდგომისთვის? „თბილისი თაიმსს“ „ველის ვაინის“ დამფუძნებელი და მეღვინე, გეგა ქათამაძე ესაუბრა.
რას აწარმოებთ და რა მიზნებზე ხართ ორიენტირებულნი?
„ველის ვაინი“ არის საოჯახო მეღვინეობა, რომელიც აერთიანებს საოჯახო მარანსა და საოჯახო ვენახებს, რომელიც მდებარეობს გურჯაანის რაიონის სოფელ ველისციხეში.
„ველის ვაინი“ კომპანიად ჩამოყალიბდა 2019 წელს. რაც შეეხება ღვინის წარმოებას, თეთრ ღვინოს ვაწარმოებთ „რქაწითელისა“ და „კახური მწვანეს“ ყურძნის ჯიშებისაგან, ხოლო წითელ ღვინოს „საფერავის“ ყურძნის ჯიშისაგან. ვაწარმოებთ როგორც ევროპულ, ასევე, კახურ ტრადიციულ ღვინოს ქვევრში.
ღვინოს ვამზადებთ საოჯახო ვენახში ჩვენივე მოყვანილი ყურძნისაგან, რომელიც მდებარეობს ალაზნის ველის მიმდებარე ტერიტორიაზე, ხოლო ეს ყოველივე გვაძლევს იმის საშუალებას, რომ ღვინო ვაწარმოოთ მორჩეული და საუკეთესო ყურძნის მტევნებისაგან. საოჯახო მარანი 1915 წელს არის აშენებული. ამ პერიოდიდან მოყოლებული, ჩვენი წინაპრები ამ მარანში აყენებდნენ კახურ ტრადიციულ ღვინოს. სწორედ ეს გახდა ჩვენი მოტივაცია, გაგვეგრძელებინა ოჯახური ტრადიცია. ეს არის ჩვენი მთავარი მიზანი და, რა თქმა უნდა, ნატურალური, მაღალი ხარისხისა და ღირსების მქონე ღვინის წარმოება.
პანდემიის ფონზე როგორ დაუკავშირდა თქვენი საქმიანობა შიდა ტურიზმის ხელშეწყობას?
ამ ეტაპისთვის, ჩვენი მარანი ვერ იღებს დამთვალიერებლებს, რადგან მარანს ეტაპობრივად უტარდება რეაბილიტაცია. აქედან გამომდინარე, ეს არის შემაფერხებელი ფაქტორი, თუმცა იმედს ვიტოვებ, რომ უახლოეს მომავალში შევძლებთ, გავაცნოთ ჩვენი ოჯახური ღვინის წარმოების ტრადიცია და საქმიანობა როგორც ქართველ, ასევე, უცხოელ სტუმრებს.
რთველისთვის როგორ ემზადებით და რა შედეგებს ვარაუდობთ?
რაც შეეხება რთველისთვის მოსამზადებელ პერიოდს – დავასრულეთ მწვანე ოპერაციები და ვენახის შეწამვლითი სამუშაოები, კვლავ დაგვრჩა რამდენიმე პროცედურა ჩასატარებელი, რომელიც გულისხმობს ვენახში ბალახისა და ზედმეტი ფოთლების მოცილებას, რათა სიმწიფის პერიოდში ყურძნის მტევნებამდე მარტივად მიაღწიოს მზის სხივებმა. ამ ეტაპისთვის, ვვარაუდობთ, რომ კარგი მოსავალი გვექნება წელს. იმედს ვიტოვებთ, რომ სტიქიური მოვლენები არ შეგვიშლიან ხელს ყურძნის დამწიფებამდე.
უცხოელებთან თქვენი კონტაქტის შესახებ რას გვეტყვით?
ჩვენი ერთერთი მთავარი გამოწვევაა, რომ ჩვენი ღვინო გაიცნონ როგორც შიდა ბაზარზე, ასევე, საქართველოს საზღვრებს გარეთ. გვაქვს კომუნიკაცია რამდენიმე ქვეყნის წარმომადგენელთან მიუხედავად იმისა, რომ მოლაპარაკებების მხრივ ხელი შეგვიშალა პანდემიის გამო მსოფლიოში შექმნილმა ვითარებამ. იმედი გვაქვს, ძალიან მალე შევძლებთ, გავცდეთ საზღვრებს და გავაცნოთ ქართული ღვინის უპირატესობები მსოფლიოს.
ავტორი: მარიამ ტიელიძე
