„მასტერშეფი“ ქართულ ტელესივრცეში, მეტნაკლებად, ახალი პროექტია. ფაქტია, რომ ის ძალიან პოპულარულია ქართველი მაყურებლისთვის. სულ ახლახან, მისი მესამე სეზონი დასრულდა.
შოუს ერთერთი ფინალისტი ანნა კუჭავა გახლდათ. შრომისა და მონდომების ფონზე, მან გადალახა ტურები, მოულოდნელი დავალებები უკან მოიტოვა კონკურენტები და, საბოლოოდ, საუკეთესო სამეულში აღმოჩნდა. „თბილისი თაიმსი“ ანნას პეტსონას გთავაზობთ.
გრანდიოზულ პროექტში მონაწილეობის მიღებაზე ბევრ ჩვენგანს ბავშვობაში უოცნებია და დღესაც ბევრი ბავშვი ოცნებობს. სწორედ ბავშვობას უკავშირდება ანნასთვის „მასტერშეფში“ მონაწილეობა. ოცნება აიხდინა და თან – მაქსიმალური წარმატებით. წინა ორი სეზონის მიმდინარეობისას არ უფიქრია მასში მონაწილეობაზე. უკვე მესამე სეზონზე კი ისე მოხდა, რომ ანნა კუჭავას სახელით რამდენიმე აპლიკაცია გაიგზავნა – მის გარდა, მისი მეგობრების მიერ.
იმის გამო, რომ კულინარიული პროექტი სიახლე იყო საქართველოსთვის, ანნა აკვირდებოდა, როგორ განვითარდებოდა ის და როგორ მიიღებდა მაყურებელი. თავს იკავებდა, რადგან მისთვის კულინარია არ იყო პროფესია, არც შესაბამისი განათლება აქვს და, მით უმეტეს, რომ ეს სფერო მუდამ ვითარდება. არ ჰქონდა იმის მოლოდინი, რომ 12 საუკეთესოში მოხვდებოდა. თუმცა, სულ ცოტახნით ადრე მიხვდა, რომ „უკან დასახევი გზა აღარ ჰქონდა“.
გააზრებული ჰქონდა, რომ, გარდა კულინარიული პაექრობისა, ეს იქნებოდა შოუ და მნიშვნელოვანი იყო, როგორ მიიღებდა მას საზოგადოება. ახლა კი უკვე მიიჩნევს, რომ პროექტის მიმდინარეობისას აბსოლუტურად გულახდილი და ბუნებრივი იყო და ბედნიერია ამის გამო. ეკრანიდან ჩანდა, რომ სწორედ ანნა გამოხატავდა ემოციებს ყველაზე მეტად. ჩანდა, რა ახარებდა და რა წყვეტდა გულს.
„ცხადია, წინა სეზონებს თვალ-ყურს ვადევნებდი. „მასტერშეფის“ პროფილიდან და საერთაშორისო სტანდარტებიდან გამომდინარე, ეს არის მოყვარულების კონკურსი. თუმცა, ერთმანეთს პროფესიონალები და მოყვარულები ეჯიბრებიან. რთულია, შეეჯიბრო ადამიანს, რომელსაც ეს საქმე ნასწავლი აქვს, ტექნიკურად აბსოლუტურად ორგანულად გრძნობს თავს. მე პირადად, შეგრძნებებზე, იმპულსებსა და გემოვნებაზე ვიყავი დამოკიდებული ჩემი კერძის შექმნისას. სწორედ ამიტომ, ძალიან მეშინოდა.
ტურიდან ტურში გადასვლისას სულ უფრო მიმძაფრდებოდა ის შეგრძნება, რომ უნსა მებრძოლა ბოლომდე, რადგან მქონდა ჩემი ნიშა, ჩემი ხელწერა. ვფიქრობ, თითოეულ კონკურსანტს ღირსეული კონკურენცია გავუწიე.
ავტორი: მარიამ ტიელიძე
