10 ოქტომბერს ცივილიზებული სამყარო ფსიქიკური ჯანმრთელობის მსოფლიო დღეს აღნიშნავს და ყოველ წელს მსჯელობისთვის გვთავაზობს განსხვავებულ თემას. ეს ის თემებია, რომლებიც ყველაზე მნიშვნელოვანი გამოწვევაა ფსიქიკური პრობლემების მქონე ადამიანებისა და მათი ოჯახებისთვის.
წლევანდელი 10 ოქტომბრის სლოგანი კი ასეთია – „ფსიქიკური ჯანმრთელობა ყველასთვის – მეტი ინვესტიცია, მეტი მისაწვდომობა“. იგი გულისხმობს გეოგრაფიულ, ფინანსურ თუ სხვადასხვა საჭიროებაზე მორგებულ სერვისებზე თანაბარი წვდომის შესაძლებლობების გაზრდას.
ამ დღესთან დაკავშირებით, ფსიქიატრიულმა თემმა, საქართველოს პარლამენტისა და ჯანდაცვის სამინისტროს წარმომადგენლებთან ერთად, სტაციონარგარეთა სერვისების 2020 წლის მარტი-აგვისტოს მონიტორინგის შედეგები შეაჯამა. შეხვედრაზე ასევე შეაფასეს სათემო ფსიქიატრიული ამბულატორიული სერვისების ხარისხი, გარდა ამისა, სათემო ფსიქიკური ჯანმრთელობის მობილური სერვისების საქმიანობა.
კვლევის ერთ-ერთი ავტორის, ფსიქიატრ ეკა ჭყონიას შეფასებით, აღნიშნული შეხვედრა სრულად მოიცავს 10 ოქტომბრის თემატიკას. ის შესაბამის პრობლემებზეც საუბრობს.
„ჩვენი შეხვედრა სრულიად ეხმიანება წლევანდელი 10 ოქტომბრის თემატიკას, რომელიც მიმართულია სერვისების გაუმჯობესებაზე. მსგავსი ტიპის მონიტორინგი 2017 წლიდან ყოველწლიურად ტარდება და, შესაბამისად, ჩვენ ვადარებთ ახალ მონაცემებს წინა წლების შედეგებთან. აღსანიშნავია, რომ წელს ნამდვილად არის წინგადადგმული ნაბიჯები, თუმცა, გამოვლინდა მთელი რიგი პრობლემებისა, რომელთა დაძლევა შესაძლებელია. ეს ეხება მაგალითად, აღდგენაზე ორიენტირებული სერვისების დანერგვას – ფსიქოსოციალური დახმარების გაწევას, უფრო კომპლექსურ მიდომას ჩვენი პაციეტების ზრუნვის მიმართულებით“, – განმარტავს ჭყონია.
„ფსიქიკური ჯანმრთელობის სტაციონარგარეშე სერვისების ეფექტურობის კვლევა“ 16 სათემო ფსიქიატრიული ამბულატორიული სერვისისა და 14 თემზე დაფუძნებული მობილური გუნდის საქმიანობას მოიცავს. ის მომზადდა პეტრე შოთაძის სახელობის თბილისის სამედიცინო აკადემიისა და „ალიანსი უკეთესი ფსიქიკური ჯანმრთელობისთვის“ კვლევითი გუნდის მიერ, “კონსულტაციისა და ტრენინგის ცენტრის“ მხარდაჭერით.
