მთელს მსოფლიოში ჩვენი ქვეყანა გამორჩეულია, როგორც მეღვინეობის ქვეყანა. საქართველოში კი, კონკურენციის ფონზე, არსებობს ბრენდები, რომლებიც უკეთესია სხვებზე. ყველა რეგიონს აქვს მისთვის დამახასიათებელი ყურძნის ჯიშები, შესაბამისად, თითოეული გემო განსაკუთრებულია.
არცთუ ისე დიდი ხანია, დაარსდა მეღვინეობა – „ქვე შენი ჭირიმე“. გარდა ჩვენი ქვეყნისა, მისი წარმოებით უცხო ქვეყნებიც სარგებლობენ, რაც, ბუნებრივია, ბრენდის ხარისხზე მიუთითებს.
უფრო მეტ დეტალზე ბრენდის დამფუძნებელი და მეღვინე, აკაკი სირაძე „თბილისი თაიმსს“ ესაუბრა.
რამდენი ხანია, რაც თქვენი მეღვინეობა არსებობს?
ჩემი პირველი ბრენდირებული ღვინო გამოვიდა 2017 წელს და სწორედ ამ წელს დავაფუძნე მეღვინეობა „ქვე შენი ჭირიმე“, რომელიც აგებულია მთლიანად რაჭულ ელემენტებზე. ბრენდის შექმნისას მთავარი მიზანი იყო, ხაზი გამესვა რაჭისა და რაჭული ჯიშებისათვის. ამიტომ, გადავწყვიტე, ამ სახელწოდებით წარმედგინა ღვინო მომხმარებლისთვის. ასევე – ქვე შენი ჭირიმე უკვე მივიწყებული დიალექტური ფორმაა, რაჭისთვის დამახასიათებელი და მისი მნიშვნელობა შემდეგნაირია – ამ ფორმით ძველად რაჭაში საყვარელ და ძვირფას ადამიანებს მიმართავდნენ და ასე გამოხატავდნენ ერთმანეთის მიმართ სიყვარულს, პატივისცემას.
სწორეთ სიყვარულითა და სითბოთი ვქმნით ჩვენს ღვინოებს საყვარელი მომხმარებლისათვის.
სად და რა ჯიშებისგან აწარმოებთ ღვინოს?
ჩემი მარანი და აწ უკვე მშენებლობის პროცესში მყოფი ახალი მარანი მდებარეობს რაჭაში, სოფელ ბუგეულში, ხვანჭკარის მიკრო ზონაში, მდინარე რიონის მარცხენა სანაპიროზე. სოფელ ბუგეულში ვფლობთ ორ ჰექტარ ვენახს. ვენახის 90 პროცენტი შეადგენს ალექსანდროულისა და მუჯურეთულის ვაზის ჯიშებს. ასევე, გვაქვს საკოლექციო ნაკვეთები, როგორებიცაა რაჭული თეთრა, ცოლიკოური, რაჭული საფერავი, რაჭული მწვანე და გადაშენების პირას მისული რაჭული ვაზის ჯიში ხიხვა.
ამ ეტაპზე, ვაწარმოებთ მხოლოდ ხუთი სახეობის ღვინოს: ‘’ხვანჭკარას“, „ცოლიკოურს“, „ქვევრის ალექსანდროულ მუჯურეთულს“, ევროპული სტილის რაჭული თეთრას რაჭული მწვანის ცოლოკოურისა და ხიხვას ჯიშის სეპაჟს, წითელ მშრალ ქვევრის ღვინო „მზიას“, რომელიც შედგება ოთხი ჯიშის სეპაჟისაგან,
როგორც ვიცით, პროდუქცია ექსპორტზეც გაგაქვთ – უფრო ზუსტად, რომელ ქვეყნებში?
დიახ, ჩვენი პროდუქცია იყიდება უკვე ჰოლანდიასა და ევროპის 14 ქვეყანაში. მიწოდება შესაძლებელია საიტიდან შეკვეთის შემთხვევაში. ასევე, ქვევრის ღვინითა და ,,ხვანჭკარით,, დაინტერესდნენ იაპონელი იმპორტიორები
ამ ეტაპზე, თქვენს ბიზნესთან დაკავშირებით რა სიახლეებია?
სიახლე ძალიან ბევრია. ჩვენ გავაშენეთ ახალი ვენახები, დავიწყეთ ახალი მარნის მშენებლობა, რომელიც უკვე დასასრულს უახლოვდება. მარანი მოიცავს სადეგუსტაციო სივრცეს, ღია რესტორანს ტერასაზე, საიდანაც ვიზიტორს მიეცემა საშუალება, დატკბეს ულამაზესი ხედებით. ასე რომ, 2021 წლის ივნისიდან ჩვენი მარნის კარი ღიაა ვიზიტორებისთვის.
მასალა მოამზადა : მარიამ ტიელიძემ
