არ გაგიკვირდეთ, თუ თბილისში ფეხით მოსიარულე ჯგუფები ქართულენოვან გიდთან ერთად შეგხვდებათ. საფეხმავლო ტურები პროექტ „გაიცანი შენი თბილისის“ ფარგლებში აქტიურად ტარდება. გიდების მხარდასაჭერი პროექტი “გრატა დიემსის” ინიციატივით შეიქმნა. მისი მხარდამჭერია თბილისის მერია და თბილისის საკრებულოს განათლებისა და კულტურის კომისია.
პროექტთან დაკავშირებით, უფრო კონკრეტულად, მისი შექმნის მიზეზებისა და მიზნების შესახებ “თბილისი თაიმსს” მისი ინიციატორი, “გრატა დიემსის” გენერალური დირექტორი, ირმა კოდუა უყვება.
“პროექტი, რომელიც ადგილობრივი ტურიზმის გამოცოცხლების მიზნითa და მეგზურთა მხარდასაჭერად შეიქმნა, აქტიურად ატარებს თბილისში საფეხმავლო ტურებს. აღმოჩნდა, რომ ბევრი ადგილობრივი მოსახლისთვის საინტერესოა ქალაქის ქუჩებში სეირნობა მეგზურთან ერთად. პროექტის მონაწილეობის მისაღებად მეგზურებმა სპეციალური, საავტორო ტურები შექმნეს, რათა ადგილობრივებისთვის საინტერესო ყოფილიყო. შედეგად, ძალიან საინტერესო ტურები გამოვიდა, ყველაზე საყურადღებო ადგილებით, სხვადასხვა შინაარსისა და განსხვავებული მარშუტით, რომლებიც ქალაქის სხვა კუთხით დანახვის საშუალებას იძლევა. დაინტერესებულ პირებს ტურები შეუძლიათ, შეარჩიონ ვებგვერდზე grataevents.com, რომელიც სპეციალურად ამ პროექტისთვის შევქმენით.
ვებგვერდზე ნებისმიერ მეგზურს შეუძლია, განათავსოს საავტორო ტური. ამისთვის უნად მოგვწეროს ელ-ფოსტაზე [email protected]. აღსანიშნავია, რომ ტურები რეკომენდაციებისა და რეგულაციების დაცვით ტარდება, ასევე, ტარდება ტურები სადაც ერთი ოჯახი ან სამეგობრო მოდის, ასე ვთქვათ, ერთი კლასტერი და ტურები დახურულად ტარდება. ასეთ შემთხვვევაში, პირადად გვწერენ მსურველები ტურის დასაჯავშნად”.
აღნიშნული პროექტის შესახებ პროექტის მონაწილე, მეგზური ანა თეიმურაზიშვილიც გვესაუბრა.
“პანდემიამდე ადგილობრივი ტურიზმი, დაახლოებით, 10-15%-ს იკავებდა, თუმცა, დღეს სტაგნაციას განიცდის და ამ სფეროს უფრო მეტად სჭირდება გვერდში დგომა. ადგილობრივ ტურებზე მოთხოვნა მოქალაქეებისგან ნელ-ნელა მატულობს. პროექტში ჩავერთე, რადგან დიდი სურვილი მაქვს, რომ ჩვენი ქალაქი უკეთ გავაცნო ადგილობრივებს. ბევრი მოქალაქე არც ისე კარგად იცნობს თბილისს, რომელიც დიდი ისტორიის მატარებელია. ჩემს საავტორო ტურში მონაწილეებს ვაცნობ ჩვენი ქალაქის ერთ-ერთ ყველაზე ლამაზ და საინტერესო გამზირს აღმაშენებელს თავისი ისტორიით, კულტურით, არქიტექტურითა და საინტერო მოქალაქეებით”.
ინფორმაციისთვის, ტურში მონაწილეობის ღირებულება 1 ადამიანზე შეადგენს 20 ლარს და ის სრულად მეგზურის ანაზღაურებაა. 10 წლამდე ბავშვებისთვის ტურში მონაწილეობა უფასოა.
მასალა მოამზადა : მარიამ ტიელიძემ
