წიგნს ადამიანებში ძალა არ დაუკარგავს. პირიქით, უფროდაუფრო მეტ ენერგიას ითავსებს და გასცემს კიდეც. დრო გადის, ადამიანებს მის მიმართ ინტერესი უძლიერდებათ. იზრდება იმ ავტორების რაოდენობაც, რომლებიც თანამედროვეობის პრობლემებზე, ახალგაზრდების საკითხებზე გვთავაზობენ ნაწარმოებებს.
საინტერესოა, რას კითხულობენ დღევანდელი თაობის წარმომადგენლები, რომელი ავტორების შემოქმედებაა მათთვის გამორჩეული და რა მიზეზების გამო? “თბილისი თაიმსი” ახალგაზრდების კომენტარებს გთავაზობთ.
მარიამ ურუშაძე
“ჩემთვის ერთ-ერთი გამორჩეული თანამედროვე ქართველი პოეტი ლია ლიქოკელია. პირველად ლიას ლექსი 4 წლის წინ წავიკითხე. ბებიაზე წერდა ისე ემოციურად, ცრემლების გარეშე ვერ წავიკითხე. მალე ჩემი ბებო გარდაიცვალა და ლიას ლექსი ამის მერე კიდევ ბევრჯერ წავიკითხე, თითქოს, ახლობელი გახდა ჩემთვის მისი განცდები. ვფიქრობ, განსხვავებული სტილი აქვს ამ გოგოს, თითქოს, ნაცნობია ყველაფერი,რაზეც წერს. მაგრამ საოცრად ღრმად და სხვა კუთხიდან შეგახედებს ჭეშმარიტებას. განსაკუთრებული წერის სტილი, ვფიქრობ, გამოარჩევს სხვა თანამედროვე პოეტებისგან, ხელწერა აქვს, რომლითაც მარტივად ამოიცნობ სხვებში. ლიამ მასწავლა, როგორ დავარღვიო კანონები გოგოობის კანონის დაცვით”.
ქრისტინე ლომიძე
“თანამედროვე მწერლებიდან ჩემთვის ყველაზე მეტად გამორჩეულია დათო ტურაშვილი, განსაკუთრებულად დამამახსოვრა თავი თინეიჯერულ ასაკში, რადგან მაშინ წავიკითხე პირველად “ჯინსების თაობა”. განსხვავებული წერის სტილი აქვს, რომლითაც მკითხველის ყურადღებას იქცევს. ძალიან მიყვარს “ამერიკული ზღაპრები”. ერთი ამოსუნთქვით იკითხება მისი ყველა წიგნი, ჩემთვის, ყოველ შემთხვევაში, ასეა”.
მარიტა გვარამია
“თანამედროვე მწერლებს შორის გამოვარჩევდი გიორგი კეკელიძეს. მარტივი და გასაგები ენით წერს, ყველასთვის რეალურ და ნაცნობ საკითხებზე. მისი შემოქმედება ემოციურად იკითხება და, თითქოს, მკითხველიც ნაწილი ხდება რომელიმე ამბისა.
რაც შეეხება პოეტს, გამორჩეულად მომწონს თემურ ელიავას შემოქმედება. მისი ლექსები გამოირჩევა საინტერესო სიტყვათა შეთანხმებით, ერთი შეხედვით, რთულია ლექსის შინაარსში ჩაწვდომა და გაგება”.
გიორგი მაღლაკელიძე
“ვფიქრობ, ერეკლე დეისაძე დღეს ყველაზე მეტად საკამათო მწერალია საკუთარი შემოქმედებიდან, წერის სტილიდან, საკითხის გადმოცემის ფორმიდადნ გამომდინარე. თუმცა, ჩემთვის ის განსაკუთრებულია სწორედ მისი გამორჩეულობიდან გამომდინარე. უნდა ვთქვა, რომ მის ერთ კონკრეტულ ნაწარმოებს ვკითხულობ არაერთხელ, მინიმუმ ორჯერ. მომწონს ის სამყარო, ის მოცემულობები, რომლებსაც ის გვთავაზობს”.
მასალა მოამზადა : მარიამ ტიელიძემ
