პანდემიის პარალელურად, საქართველოში არასახარბიელო პოლიტიკური პროცესები აქტიურად მიმდინარეობს. ოპოზიცია არჩევნების შედეგებს არ აღიარებს და პროტესტის სხვადასხვა ფორმას მიმართავს. ოპოზიციური პარტიები აცხადებენ, რომ მათი პოზიცია ერთიანია. რა ხდება რეალურად? რამდენად მტკიცეა მათი ერთობა და რა პროცესებია მოსალოდნელი?
“თბილისი თაიმსის” შეკითხვებს ანალიტიკოსი, ზაალ ანჯაფარიძე პასუხობს.
რა სცენარით შეიძლება, განვითარდეს ოპოზიციის პროტესტი?
სცენარი შეიძლება, ბევრნაირი იყოს. ეს დამოკიდებულია იმაზე, რას გადაწყვეტენ პოლიტიკური პარტიები, რაზე შეთანხმდებიან ისინი და რა რესურსები აქვთ – იქნება ეს ფინანსური, მატერიალური, ადამიანური თუ სხვა.
ჩემს ხელთ არსებული ინფორმაციით, შეთანხმდნენ, რომ მასობრივი აქციები არ იქნება და იქნება მხოლოდ ოპოზიციის ლიდერების შეზღუდული გამოსვლა. მაგრამ ეს არ ნიშნავს იმას, რომ სამომავლოდ ეს მიდგომა არ შეიცვლება. ნებისმიერ შემთხვევაში, პროტესტი იქნება, მაგრამ თუ გავითვალისწინებთ იმას, რომ მათ წინა აქციებზე მაინცდამაინც ბევრი ადამიანის შეკრება ვერ მოახერხეს, მით უმეტეს ახლა, ამ შეზღუდვების ფონზე, როდესაც პანდემიის მასშტაბები მზარდია, მე არ მგონია, რომ საზოგადოებამ გარისკოს სიცოცხლე და ჯანმრთელობა მათთვის აბსოლუტურად გაუგებარი მიზნების გამო.
საზოგადოება სჯერა ოპოზიციის?
ამომრჩეველი ხედავს, რომ ოპოზიციას აწუხებს არა იმდენად ხალხის გასაჭირი და მათი პრობლემები, არამედ – ძალაუფლების ხელში ჩაგდება, ამითაც არის ის გამოწვეული, რომ მათ მიერ ადრე გამართულ აქციებზე ბევრი ხალხი არ მიდიოდა, რადგან იცოდნენ, რომ ეს ყველაფერი ოპოზიციას საკუთარი პოლიტიკური ინტერესებისთვის სჭირდებოდა. ვფიქრობ, ახლაც. დაახლოებით, იგივე სურათი იქნება.
პარლამენტში შესვლა-არშესვლასთან დაკავშირებით ყველაზე რეალური რა სურათი იკვეთება?
ისეთი შთაბეჭდილება მრჩება, რომ ოპოზიციური პარტიები კი ამბობენ, პარლამენტში არავითარ შემთხვევაში შევალო, ერთობას შევინარჩუნებთო, ერთმანეთს არ ვუღალატებთო, მაგრამ რამდენიმე მათგანის განცხადებებში იკვეთება ისეთი ნიუანსები, რომ შესაძლოა, გარკვეული პირობების დაკმაყოფილების შემთხვევაში, გადახედონ საკუთარ გადაწყვეტილებებს. ყოველ შემთხვევაში, გააჩნია მოლაპარაკების მესამე რაუნდს, რომელიც ჯერ კიდევ ვერ შედგა, რადგან მხარეებმა ვერ შეიმუშავეს წინადადებები, რომლებსაც ერთმანეთის წინაშე დადებდნენ მაგიდაზე. თუმცა, თუკი შედგება, ალბათ, ამ მესამე რაუნდის შემდეგ უფრო თვალსაჩინო იქნება, რა მოხდება.
