კულტურისა და ძეგლთა დაცვის სამინისტროს გავრცელებული ინფორმაციის თანახმად, პროექტისთვის “check in Georgia”ბიუჯეტიდან 29 მილიონი გამოიყოფა. ამ ფაქტს, საზოგადოების გარკვეული ნაწილის მხრიდან, უკმაყოფილება მოჰყვა.
პროექტი მასშტაბურია და ბევრ სხვადასხვა ღონისძიებას მოიცავს, მათ შორის კი, პოპულარული მუსიკოსების საქართველოში ჩამოყვანას.
ღონისძიებები სტარტს აპრილიდან აიღებს და წლის ბოლომდე გაგრძელდება. პროექტი არ იქნება მარტო ლოკალური ხასიათის და, თბილისის გარდა, რეგიონებსაც მოიცავს.
რამდენიმე დღის წინ უკვე რამდენიმე ცნობილი მუსიკოსის კონცერტის საქართველოში ჩატარების შესახებ გახდა ცნობილი.
ჯერჯერობით, ცნობილი მუსიკოსების სია ასე გამოიყურება: : ეროს რამაზოტი (24 აპრილი, თბილისი), რობი უილიამსი (27 მაისი, თბილისი), “Maroon 5“ (7 ივნისი, ბათუმი), ხოსე კარერასი (18 ივნისი, ქუთაისი).
როგორც ცნობილია, კონცერტების ფასი, ძირითადად, სიმბოლური იქნება და 20 ლარიდან 90 ლარამდე იმერყევებს.
გარდა ამისა, „Check in Georgia” მოიცავს ქართველი და უცხოელი შემსრულებლების მონაწილეობით ქვეყნის 19 ქალაქში დაგეგმილ კონცერტებს, 35 ფესტივალს, მათ შორის: თეატრალური ფესტივალები, კინოფესტივალები, მუსიკალური ფესტივალები, ანიმაციური ფილმების ფესტივალები, თანამედროვე ხელოვნების ფესტივალები, ქორეოგრაფიული ფესტივალი, მოდის კვირეულები, ფოტოფესტივალები და სხვ.
ნატალია ჯალაღონია
