სახელმწიფო უსაფრთხოების სამსახურის უფროსის მოადგილის ლევან იზორიას განცხადებით, ტერორისტების სამიზნე არის ქვეყნები, რომლებიც საომარ მოქმედებებს ახორციელებენ სირიასა და ერაყის ჩრდილეთით.
როგორც იზორიამ ტელეკომპანია “მაესტროს” ეთერში, გადაცემა “მაესტროს ფაქტორში” სტუმრობისას აღნიშნა, საქართველო ასეთი ქვეყნების რიგში არაა.
“რაც შეეხება იმას, რამდენად არის საქართველო რისკის შემცველი სახელმწიფოების რიცხვში, ეს ასე არ არის. თქვენ მოგეხსენებათ, რომ ძირითადი სამიზნე ამ შემთხვევაში არის ქვეყნები, რომლებიც უშუალოდ საომარ მოქმედებებს ახოცრიელებენ სირიასა და ერაყის ჩრდილეთით. ე.წ ისლამური სახელმწიფოს წინააღმდეგ. ეს მათ საჯაროდ გამოქვეყნებულ მუქარებში და წერილებშიც არის საჯაროდ დაფიქსირებული, კერძოდ, საუბარია სახელმწიფოებზე, ჩვენს სტრატეგიულ პარტნიორებზე, რომლებიც საჰაერო ოპერაციებს ახორციელებენ აღნიშნულ რეგიონში და როდესაც შეფასება ხდება საფრთხეებისა და კატეგორიზება, თუ რომელია მაღალი რისკის ქვეყანა, საფრთხის შემცველობის თვალსაზრისით, ბუნებრივია, ეს ქვეყნებია საერთაშორისოდ აღიარებული, თუმცა, კიდევ ერთხელ ვამბობ, ჩვენ, განსაკუთრებით უწყებას, რომელიც პასუხისმგებელია სახელმწიფოს უსაფრთხოებაზე, არ გვაძლევს მოდუნების საშუალებას. ჩვენ ყველა განცხადებას, ყველა მუქარას სერიოზულობით ვეკიდებით. მიდგომა არის თანაბარი”, – განაცხადა იზორიამ.
