არცთუ ისე დიდი ხანია, ქართულმა საზოგადოებამ ირაკლი მაკასარაშვილი გაიცნო. ის პროექტ “მასტერშეფიდან” გახდა ცნობილი. ირაკლი პროექტის მეოთხე სეზონის ფინალისტია. ტურიდან ტურამდე არაერთი ადამიანი გულშემატკივრობდა. მის მიმართ მაყურებლები დადებით ემოციებს გამოხატავდნენ და კარგ შეფასებებს არ იშურებდნენ.
მის ყოველდღიურობაში კულინარია სამი წლის წინ გაჩნდა. როგორც თვითონ ამბობს, კარგი შეფების გამოცდილება გაიზიარა და სამომავლოდ უფრო მაღალ საფეხურზე იქნება. “თბილისი თაიმსს” ირაკლი თავად ესაუბრა.
რატომ გადაწყვიტე პროექტში მონაწილეობის მიღება?
მონაწილეობა გადავწყვიტე საკუთარი თავის გამოცდის მიზნით. ამისთვის “მასტერშეფი” საუკეთესო პროექტია. გამოვცადე საკუთარი უნარები და შესაძლებლობები. პროექტი დასრულდა და ახლა მე უკვე მაქვს ჩემი გეგმები.
რა შეიცვალა შენთვის “მასტერშეფის” დასრულების შემდეგ?
გავხდი მეტად ცნობადი. ქუჩაში მაჩერებენ ადამიანები, მესალმებიან. გარდა ამისა, საკუთარ თავში უფრო მეტად დარწმუნებული გავხდი – მივხვდი, რომ ბევრად მეტის და კარგი რაღაცების გაკეთება შემიძლია, ვიდრე ვაკეთებდი შედარებით ადრე. სწორედ ამიტომ, დავიწყე ინტენსიური მუშაობა, ამ მიმართულებით უკვე დაუღალავად ვშრომობ.
ამ მხრივ, რა გეგმები გაქვს უახლოეს მომავალში?
უახლოესი მომავალში მექნება კვების საკუთარი ობიექტი და მექნება შესაძლებლობა, გავუმასპინძლდე ჩემს ერთგულ გულშემატკივარს, საზოგადოებასა და ადამიანებს, რომლებსაც, უბრალოდ, აინტერესებთ, კულინარია.
და მეორე, მალე მექნება საკუთარი “youtube არხი”, სადაც განვიხილავთ საჭმელებს თბილისის მასშტაბით, ტექნიკას, ფასებსა და ყველაფერს. ანუ ეს იქნება არხი, სადაც გავსინჯავთ პროდუქტებს, დავაგემოვნებთ, შევაფასებთ ვიზუალს და ა.შ. ამ გეგმების 60% უკვე შესრულებულია. საკმაოდ ბევრი საინტერესო იდეა მაქვს კიდევ.
კულინარიის გარდა, რით ხარ დაინტერესებული?
გარდა კულინარიისა, მაქვს არაერთი ჰობი. ხშირად დავდივარ ლაშქრობებში და ა.შ. თუმცა, ვფიქრობ, რომ კულინარია სრულად მყოფნის, რადგან ბევრი მიმართულება აქვს და კარგად არის შესაძლებელი “ფრთების გაშლა”.
მასალა მოამზადა : მარიამ ტიელიძემ
