რატომ მიიპყრო კოვიდის ახალმა შტამმა მეცნიერები

დიდი ბრიტანეთის პრემიერ-მინისტრი, ბორის ჯონსონი მეცნიერებზე დაყრდნობით აცხადებს, რომ კორონავირუსის ახალი სახეობა დღემდე ცნობილ შტამზე 70%-ით უფრო გადამდებია.

COVID-19-ის ახალი სახეობის გავრცელების გამო, დიდი ბრიტანეთის სამხრეთ-აღმოსავლეთ რაიონებში, ლონდონის ჩათვლით, ეპიდემიოლოგიური საფრთხის უმაღლესი – მეოთხე დონე და მკაცრი კარანტინი გამოცხადდა.

სწრაფად გავრცელებადი შტამის გამო ევროპის ქვეყნებმა გაერთიანებულ სამეფოსთან საზღვრების ჩაკეტვა დაიწყეს.

გერმანიამ, იტალიამ და ნიდერლანდებმა ბრიტანეთიდან ფრენები შეწყვიტეს. გაერთიანებული სამეფოდან ავია და საზღვაო რეისებზე შეზღუდვები დააწესა ირლანდიამაც. ამასთან, ქვეყანასთან საჰაერო და სარკინიგზო საზღვრების ჩაკეტვის გადაწყვეტილება ბელგიამაც მიიღო.

ასევე, უწყებათაშორისი საბჭოს გადაწყვეტილებით, ბრიტანეთიდან საქართველოში ჩამომსვლელმა ადამიანებმა 12-დღიანი სავალდებულო კარანტინი უნდა გაიარონ.

|რატომ მიიპყრო კოვიდის ახალმა შტამმა მეცნიერების ყურადღება

არსებობს სამი მიზეზი, რატომაც კოვიდის ახალმა შტამმა საზოგადოებაში შეშფოთება გამოიწვია.

ახალმა შტამმა მალევე ჩაანაცვლა ვირუსის სხვა არსებული ვარიანტები
ახალი მუტაცია გავლენას ახდენს ვირუსის ისეთ ნაწილზე, რომელიც შესაძლოა ძალიან მნიშვნელოვანი იყოს
პირველადმა ლაბორატორიულმა ანალიზმა აჩვენა, რომ ზოგიერთმა მუტაციამ ვირუსის მიერ უჯრედის დაინფიცირების უნარი გაზარდა

თუმცა, ჯერჯერობით დაზუსტებით არაფრის თქმა არ შეგვიძლია, რადგან მეცნიერები კვლევის პროცესში არიან.

|რამდენად სწრაფად ვრცელდება

WHO-ს განცხადებით, კოვიდის ახალი ფორმა დიდ ბრიტანეთში პირველად სექტემბერში აღმოაჩინეს. ნოემბერში ლონდონში დაფიქსირებული ვირუსის ახალი შემთხვევების დაახლოებით მეოთხედი ახალ შტამს უკავშირდებოდა. ეს რიცხვი დეკემბრის შუა რიცხვებში 2/3 გახდა.

„ჯერჯერობით წინასწარ რამის თქმა ძალიან ადრეა. მაგრამ რასაც ვუყურებთ, ვირუსი დღემდე ცნობილ შტამზე უფრო სწრაფად ვრცელდება. მეცნიერებმა, რომლებიც ახალ სახეობას იკვლევენ, მითხრეს, რომ, შესაძლოა ვირუსის ეს სახეობა 70%-ით უფრო სწრაფად გავრცელებადი იყოს. უნდა დავაკვირდეთ“,- განაცხადა Imperial College-ის პროფესორმა, ერიკ ვოლცმა.

ჯერჯერობით არ არსებობს იმის მტკიცებულება, რომ ახალი შტამი სიცოცხლისთვის უფრო საშიშია, ან დაავადების უფრო მძიმე ფორმას იწვევს.

|რომელ ქვეყნებში გავრცელდა ახალი ტიპის კორონავირუსი

WHO-ს ინფორმაციით, დიდი ბრიტანეთის საზღვრებს გარეთ, კოვიდის ახალი სახეობის 11 შემთხვევა დაფიქსირდა.

ვირუსის ახალი შტამი აღმოჩენილია დანიაში, ავსტრალიაში, ნიდერლანდებში, სამხრეთ აფრიკასა და იტალიაში.

|მსგავსი რამ ადრეც მომხდარა?

დიახ.

კოვიდის ის ფორმა, რომელიც თავდაპირველად ქალაქ უჰანში აღმოაჩინეს და COVID-19-ის მსოფლიოში შემდგომ გავრცელებული ვარიანტი ერთი და იგივე არ არის.

კოვიდის მუტირებული ფორმა D614G ევროპაში თებერვლის თვეში გამოჩნდა და შემდეგ გლობალურად გავრცელდა.

მოგვიანებით ევროპაში ვირუსის კიდევ ერთი სახეობა A222V-ი გამოჩნდა, რომლის წარმოშობაც მეცნიერებმა ესპანეთში საზაფხულო არდადეგებს დაუკავშირეს.

არსებობს კოვიდის მუტირებული სხვა ფორმებიც.

|საიდან წარმოიშვა კოვიდის ახალი შტამი

ვირუსის ახლადაღმოჩენილი შტამი უჩველოდ არის მუტირებული.

სავარაუდოდ, ახალი ვარიანტი იმ პაციენტის ორგანიზმში წარმოიშვა, რომლის იმუნურმა სისტემამაც კოვიდის დამარცხება ვერ შეძლო და ამიტომ ვირუსმა ორგანიზმი მუტაციისთვის გამოიყენა.

ლონდონის Imperial College-ის კოლეჯის ინფექციური დაავადებების განყოფილების ხელმძღვანელის, ვენდი ბარკლაის განცხადებით, კორონავირუსის ახალ სახეობას, რომელიც ამ დროისთვის ბრიტანეთში ვრცელდება, ბევრი მუტაცია აქვს.

„ჩვეულებრივი ვირუსები ერთმანეთისგან ერთი ან ორი ცვლილებით განსხვავდებიან, მაგრამ ახალ შტამს ერთდროულად 22 მუტაცია აქვს. ეს არის ერთგვარი საგანგაშო ზარი, მაგრამ ბიოლოგიურად შესაძლებელია, რომ ვირუსმა ამ მუტაციების გამო ქცევა შეიცვალოს“,- აღნიშნა ვენდი ბარკლაიმ.