ენგურის ხიდი გაიხსნა. ამის შესახებ შერიგებისა და სამოქალაქო თანასწორობის საკითხებში საქართველოს სახელმწიფო მინისტრმა მთავრობის სხდომის შემდეგ გამართულ ბრიფინგზე განაცხადა. თეა ახვლედიანის თქმით, მისასალმებელია ყველა ის ნაბიჯი, რომელიც მოსახლეობის მდგომარეობის შემსუბუქებისკენ არის მიმართული.
„ოკუპირებული აფხაზეთის მიმართულებით თავისუფალი მიმოსვლის თითქმის ერთწლიანი შემზღუდავი რეჟიმის შემდეგ, დღეიდან გაიხსნა ე.წ. გადასასვლელი ენგურის ხიდზე, რაც საშუალებას მისცემს ოკუპირებული აფხაზეთის მოსახლეობას – თავდაპირველად გარკვეულ კატეგორიებს – გადმოვიდნენ საქართველოს ცენტრალური ხელისუფლების მიერ კონტროლირებად ტერიტორიაზე“, – განაცხადა ახვლედიანმა.
მისივე თქმით, საქართველოს ხელისუფლება ყველა არსებული ბერკეტისა და მექანიზმის გამოყენებით, საერთაშორისო პარტნიორების ჩართულობითა და შუამდგომლობით მაქსიმალურ ძალისხმევას ახორციელებს მოქალაქეებისთვის თავისუფალი გადაადგილების ფუნდამენტური უფლების უზრუნველსაყოფად.
ოკუპირებული აფხაზეთის მიმართულებით საოკუპაციო ხაზის გახსნასთან დაკავშირებით სახელმწიფო უსაფრთხოების სამსახური განმარტებას აქვეყნებს.
„12 თებერვალის დღის პირველი ნახევრიდან პენსიონერები, საკუთარი სურვილის შესაბამისად, საოკუპაციო ხაზზე შეძლებენ კუთვნილი პენსიის მიღებას. საქართველოს ცენტრალური ხელისუფლების კონტროლირებად ტერიტორიაზე ოკუპირებულ რეგიონში მცხოვრები გარკვეული კატეგორიის პირები გადმოსვლას შეძლებენ, ეტაპობრივად, კორონავირუსთან დაკავშირებული კონკრეტული რეგულაციების დაცვით“, – ნათქვამია სუს-ის განცხადებაში.
