შეზღუდვების შემსუბუქებისა და მოხსნის პარალელურად, სამთხო სათხილამურო მიმართულებით მნიშვნელოვანი სიახლე გავრცელდა – ბაკურიანი FIS-ის ეგიდით გამართულ, მსოფლიო თასის ეტაპებს უმასპინძლებს.
აღნიშნული საკითხით „თბილისი თაიმსი“ დაინტერესდა და მთის კურორტების განვითარების კომპანიას დაუკავშირდა.
მოწოდებული ინფორმაციის თანახმად, 26, 27 და 28 თებერვალს ბაკურიანში სქი-ქროსის მსოფლიო თასის ეტაპი გაიმართება. წლევანდელი შეჯიბრი განსაკუთრებული იქნება, რადგან ბაკურიანი შერეულ გუნდურ შეჯიბრებას მსოფლიო თასის ფარგლებში პირველად მასპინძლობს. გუნდში თითო ქვეყნის ნაკრებიდან 1 გოგო და 1 ბიჭი იქნება. სქი ქროსი ტრასაზე ოთხი სპორტსმენის ერთდოულად დაშვებას გულისხმობს. შეჯიბრში 9 ქვეყნის 51 სპორტსმენი მიიღებს მონაწილეობას (ავსტრია, ბელგია, კანადა, ჩეხეთი, ბრიტანეთი, იაპონია, შვეიცარია, შვედეთი, ა.შ.შ.)
ბაკურიანისთვის 2021 წლის სეზონი საკმაოდ დატვირთული იქნება, რადგან საერთაშორისო სათხილამურო ფედერაციის (FIS) გადაწყვეტილებით 3,4 და 5 მარტს სნოუბორდ ქროსის მსოფლიო თასის ეტაპიც გაიმართება.
წლევანდელი შეჯიბრებებს საერთაშორისო სათხილამურო ფედერაციის (FIS) მხრიდან დაესწრება და საორგანიზაო პროცესებში მონაწილეობას მიიღებს სქი-ქროსის სახეობის რეის დირექტორი ავსტრიელი კლაუს ვალდნერი და სნოუბორდის სახეობის რეის დირექტორი გერმანელი უვე ბაიერი. საშეჯიბრო ტრასა კი მოამზადა FIS-ის რეკომენდირებულმა მშენებლებმა ტომას ბესსე-გირლანდომ და ნიკოლას ვაუდრომ.
აღნიშნული შეჯიბრებები სატესტო ღონისძიებაა მსოფლიო ჩემპიონატისთვის, რომელიც 2023 წელს თხილამურით და სნოუბორდით თავისუფალი სტილით სრიალში გაიმართება. მსოფლიო თასის ეტაპების წარმატებით ჩატარება მნიშვნელოვანი და საპასუხისმგებლოა, რადგან საქართველომ მსოფლიო რუკაზე საპატიო ადგილი უნდა დაიკაოს ზამთრის ტურიზმის მიმართულებით.
მსოფლიო ჩემპიონატის პროექტის ფარგლებში გათვალისწინებულია სატესტო შეჯიბრებების ჩატარება სხვადასხვა დისციპლინებში მსოფლიო თასის ეტაპების სახით, შესაბამისად ბაკურიანში უმსხვილესი ინფრასტრუქტურული პროექტები განხორციელდა. აშენდა სამი ახალი საბაგირო, დამონტაჟდა ხელოვნური გათოვლიანების სისტემა, შეძენილ იქნა სპეც-ტექნიკა და უსაფრთხოების ინვენტარი.
ყველა ღონისძიება FIS-ის მიერ შემუშავებული COVID პროტოკოლის, წესებისა და რეგულაციების მკაცრი დაცვით ჩატარდება.
შეჯიბრი საქართველოს მთავრობის მხარდაჭერით, ეკონომიკისა და მდგრადი განვითარების სამინისტროს „მთის კურორტების განვითარების კომპანიისა“ და საქართველოს სათხილამურო ფედერაციის ორგანიზებით გაიმართება. ღონისძიების პარტნიორი კი კომპანია „სილქნეტია“.
მასალა მოამზადა : მარიამ ტიელიძემ
