დირბის დედათა მონასტერი ქარელში, მდინარე ფრონეს ხეობაში მდებარეობს. რამდენიმე წლის წინ ტაძარს სრული რესტავრაცია ჩაუტარდა და არსებული ნალესი მთლიანად მოიხსნა.
აღსანიშნავია ის ფაქტი, რომ დირბის დედათა მონასტერი გამორჩეულია სასწაულების სიუხვით. მონასტერს ყოველდღიურად არაერთი მომლოცველი სტუმრობს და ცდილობს, რომ საკუთარი სურვილები, დიდი ხნის ნატვრები ლოცვითა და უფლის შემწეობით აისრულოს. ღვთის მადლითა და შემწეობით გახარებული ადამიანები თავიანთ ემოციებს სხვადასხვა სოციალურ ქსელში გამოხატავენ, აქედან გამომდინარე, თითქმის დღე არ გავა, რომ დირბის დედათა მონასტრის სასწაულზე ვინმემ საჯაროდ არ ისაუბროს.
როგორც წესი, დირბის დედათა მონასტერი ორსულების მფარველად ითვლება. ასობით შეჭირვებული ადამიანი, უშვილოები, სნეულნი და ამავდროულად ორსულნიც მიდიან დირბის ღვთისმშობლის მონასტერში მისი დედობრივი შემწეობისა და სითბოს საძიებლად. მორწმუნენი საკუთარი ხელით წერენ დირბის ღვთისმშობლისადმი ვედრებას, შემდეგ მათ თავს აღესრულება სასწაულები- შვილიერების, კურნებებისა და სხვათა შესახებ.
მონასტერში, ასევე, მოედინება მართლმადიდებელი მრევლი სხვა ქვეყნებიდანაც. მრავალი შეტყობინება მოდის ინტერნეტითაც. სოციალურ ქსელებში მონასტრის გვერდზე ადამიანები გვწერენ მოხსენიების თხოვნებს, საკუთარ ტკივილიან ამბებსა და მათ თავზე აღსრულებული სასწაულების შესახებ.
მასალა მოამზადა: თორნიკე ყრუაშვილმა.
