საქართველოს სტატისტიკის ეროვნული სამსახურის მიერ გავრცელებული ინფორმაციის თანახმად, მარტის თვეში საარსებო მინიმუმი შემცირდა, საშუალო მომხმარებლის არსებობისთვის საჭირო მინიმალური თანხის ოდენობა 178.1 ლარს შეადგენს.
რამდენად რელევანტურია ეს მონაცემი საქართველოში არსებული სოციალური მდგომარეობის და რა მოცემულობა იქნებოდა სასურველი – საკითხის შესახებ „თბილისი თაიმსს“ ეკონომიკის ექსპერტი, იოსებ არჩვაძე ესაუბრა.
როგორც იოსებ არჩვაძე მიიჩნევს, საარსებო მინიმუმის დაანგარიშების მეთოდი ჩვენს ქვეყანაში რეალობას ვერ ასახავს.
„საარსებო მინიმუმის დაანგარიშების მეთოდიკა მორალურად მოძველებულია და რეალობას ვერ ასახავს. 178 ლარი იქნება თუ 188, ამას არანაირი მნიშვნელობა არ აქვს. ეს იმიტომ, რომ ის, ფაქტობრივად, ვერ ასახავს რეალურ მდგომარეობას სამომხმარებლო სეგმენტში. ეს, გარკვეულწილად, მხოლოდ გამოდგება დინამიკის ან ტენდენციის საჩვენებლად“, – აღნიშნავს არჩვაძე.
ექსპერტი მიიჩნევს, რომ საარსებო მინიმუმი არსებულზე, სულ ცოტა, ორჯერ მეტი უნდა იყოს.
„ექსპერტების, სპეციალისტები, მეცნიერები მიიჩნევენ – და მეც ვიზიარებ მათ მოსაზრებას – რომ ეს მაჩვენებელი, სულ ცოტა, ორჯერ და კიდევ მეტად უნდა გაიზარდოს.
ადამიანმა არამხოლოდ უნდა იარსებოს, არამედ მან უნდა იფუნქციონიროს, როგორც სოციალურმა არსებამ და მას უნდა ჰქონდეს შესაძლებლობა, თავისი საზოგადოებრივი როლი და ფუნქციები შეასრულოს.
ამიტომ, საარსებო მინიმუმის მაჩვენებელი უნდა იყოს გაცილებით მაღალი“, – ამბობს იოსებ არჩვაძე „თბილისი თაიმსთან“ საუბრისას.
მასალა მოამზადა : მარიამ ტიელიძემ
