საინტერესო და ორიგინალური ქოთნები მათთვის, ვინც კოლექციონერია ან, უბრალოდ, მცენარეები უყვარს. ამ ადამიანებმა განსაკუთრებით იციან, რას ნიშნავს, როდესაც თავის საყვარელ მცენარეს საკუთარი კომფორტული „სახლი“ აქვს.
„ჩარგე“ სწორედ ამ მიმართულებით ზრუნავს. ხატია ღოღობერიძემ და თამარ ჭელიძემ გადაწყვიტეს, ეზრუნათ მცენარეებისთვის ლამაზი ქოთნების შექმნაზე.
დეტალურად, რას ამზადებთ?
ჩვენ ვამზადებთ ბეტონის ქოთნებს სუკულენტებისადა კაქტუსებისთვის. ასევე, გვაქვს ბონსაისთვის განკუთვნილი რამდენიმე სახეობის ქოთანი და ეზოში დასადგმელი დიდი ზომის ქოთნები.
ქოთნები დამზადებულია ბეტონის ნაკეთობების ტექნოლოგიური ციკლის სრული დაცვით, არის ძალიან მყარი და კარგად უძლებს მზესა და წყალს, ამიტომ, შესაძლებელია, გამოიყენოთ როგორ ინტერიერში, ასევე, ექსტერიერში.
როგორია ერთი ქოთნის მზადების პროცესი?
ჩვენი ქოთნები მზადდება სპეციალურ ყალიბებში, რომლებშიც იღებენ ძალიან ორიგინალურ და დახვეწილ ფორმებს. ამჟამად, ვამზადებთ 50-მდე სხვადასხვა ზომისა და ფორმის ქოთანს. ყალიბიდან ამოღების შემდეგ, ქოთნები იხატება ინდივიდუალურად. მოხატვის პროცესში შესაძლებელია მომხმარებლის სურვილების გათვალისწინება.
ძირითადად, ვინ არის თქვენი პროდუქციის მომხმარებელი?
ჩვენი მომხმარებლები არიან სუკულენტების და კაქტუსების კოლექციონერები და, ზოგადად, მცენარეების მოყვარულები. ჩვენს პროდუქციას ხშირად იყენებენ სასაჩუქრედ, რადგან შეგვიძლია,გავითვალისწინოთ საჩუქრის ადრესატის სურვილები და ინტერესები და მოვხატოთ ქოთანი ინდივიდუალურად.
სიახლეები რამდენად ხშირად გაქვთ?
ვცდილობთ, მუდმივად შევთავაზოთ მომხმარებელბს ახალი დიზაინისა და განსხვავებული ფორმების ქოთნები. ასევე, უახლოეს მომავალში ჩვენი პროდუქციის ჩამონათვალს დაემატება ეზოს დეკორაციისთვის განკუთვნილი ნაკეთობები: ბილიკები და ფიგურები.
მასალა მოამზადა : მარიამ ტიელიძემ
