ჯერ მხოლოდ ერთი წელია, რაც იცა არსებობს – ისტორიის ცენტრი აბიტურიენტებისთვის. ცენტრის ამოცანას წარმოადგენს, აბიტურიენტები სიღრმისეულად მოამზადოს ერთიანი ეროვნული გამოცდებისთვის. თუმცა, ცხადია, მისთვის პრიორიტეტი ისტორიაა – შესაბამისად, აქ აღნიშნული საგანი გაძლიერებულად ისწავლება.
ცენტრის მიზნებზე, სამომავლო გეგმებსა და სხვა დეტალებზე „თბილისი თაიმსს“ იცა-ს ერთ-ერთი დამფუძნებელი, გიორგი არქანია ესაუბრა.
რაზეა ორიენტირებული აღნიშნული ცენტრი?
იცა-ს მთავარი მიზანია, აბიტურიენტები საფუძვლიანად მოამზადოს ისტორიასა და ერთიანი ეროვნული გამოცდების სხვა საგნებში. ცენტრის შემქმნელები ისტორიკოსები ვართ, ეს ჩვენი სასწავლო დაწესებულების სახელზეც აისახა. როდესაც მის შექმნაზე ვფიქრობდით, უმთავრესი ისტორიის გაძლიერებული სწავლება იყო, მით უმეტეს, ისტორია ეროვნული გამოცდების ერთ-ერთი უმნიშვნელოვანესი საგანი გახდა. მართალია, ისტორია პირველია, მაგრამ ჩვენთან სხვა საგნებსაც დიდი ყურადღება ექცევა.
ვინ არიან იცა-ში დასაქმებულები?
აქ შესაძლებელია ერთ სივრცეში ყველა საგანში მომზადება, თითოეულ მათგანს სერთიფიცირებული, კვალიფიციური და გამოცდილი მასწავლებლები ასწავლიან. მათ შორის არიან ტრენერები, ახალი სკოლის მოდელის შემოქმედები, წიგნების ავტორები და ა.შ. მოკლედ რომ ვთქვათ, იცა წარმატებული მასწავლებელისა და მოსწავლეების შეხვედრის ადგილია.
სამომავლოდ სიახლეებს თუ გეგმავთ?
უახლოეს მომავალში ბევრი სიახლე იგეგმება. ამჟამად, იცა იმით გამოირჩევა, რომ მოსწავლეებისთვის ყოველი თვის ბოლოს ეროვნული გამოცდის ფორმატის შემაჯამებელ ტესტირებას ატარებს, სასწავლო პროგრამა ისეა განაწილებული, რომ ბოლო თვე მხოლოდ გამოცდებსა და გამეორებას ეთმობა; დამატებით ტარდება ცნობილი მეცნიერებისა და სპეციალისტების ლექციები. წელს პანდემიის გამო ბევრი ლექცია გადაიდო, მომავალ წელს მრავალ საინტერესო ღონისძიებას ვგეგმავთ. აგრეთვე, გვაქვს სპეციალური სტიპენდიები წარმატებული მოსწავლეებისთვის. სტიპენდიანტების გამოვლენა შემაჯამებელ გამოცდებზე დაფიქსირებული შედეგის მიხედვით ხდება. წელს ერთ მოსწავლეს სწავლის გადასახადი სრულად მოეხსნა, რამდენიმეს კი გაუნახევრდა. როგორც აღმოჩნდა, მსგავსი პროგრამა მათ მოტივაციას შესამჩნევად ზრდის.
მოსწავლეები რა ტიპის აქტივობებში არიან ჩართულნი?
წელს ჩვენმა ცენტრმა მოსწავლეები ძალიან საინტერესო პროექტში ჩართო – ისინი სკოლის ასაკში წიგნის შემქმნელებად აქცია. უახლოეს მომავალში გამოიცემა საქართველოს უახლესი ისტორიის ერთ-ერთი ყველაზე მნიშვნელოვანი პერიოდის ამსახველი დოკუმენტების კრებული, რომელიც ჩვენი ცენტრის მოსწავლეებმა შეადგინეს. აგრეთვე, იცა აბიტურიენტების დამხმარე წიგნებისა და ტესტების კრებულების გამოსაცემად ამზადებს, ამ პროცესშიც მოსწავლეების რეკომენდაციები, შენიშვნები და შემოთავაზებები ჩვენთვის ძალიან მნიშვნელოვანია.
მასალა მოამზადა : მარიამ ტიელიძემ
