ბოლო პერიოდში გარკვეული მედიასაშუალებების მიერ გავრცელდა ინფორმაცია იმის შესახებ, რომ ტაქსებსა და მსუბუქ ავტომობილებში თამბაქოს მოხმარება იკრძალება. აღნიშნული “თბილისი თაიმსმა” თამბაქოს კონტროლის ალიანსის ხელმძღვანელ გიორგი ბახტურიძესთან გადაამოწმა. აღნიშნულ საკითხზე დეტალური ინფორმაცია სწორედ ბახტურიძემ მოგვაწოდა.
“ტაქსებში მოწევის აკრძალვის საკითხი ჯერ კიდევ 2017 წელს იდგა. თუმცა, ეკონომიკური გუნდი იყო წინააღმდეგი. იქედან გამომდინარე, რომ მაშინ ტაქსები არ იყო რეგულირებადი სფერო, წინააღმდეგობა იყო დიდი. არის ორი მოცემულობა – მძღოლების გარკვეული ნაწილი არ არის მწეველი, მგზავრები კი რეგულარულად ეწევიან და, შესაბამისად, მძღოლები ხდებიან პასიური მწეველები. მეორე შემთხვევაა, როდესაც მგზავრებს მწეველ მძღოლთან უწევთ კომუნიკაცია და ხშირად პრობლემები და კონფლიქტებიც კი წარმოიქმნება ხოლმე. ყოფილა შემთხვევები, როდესაც მგზავრობაც კი შეუწყვიტავთ მძღოლის აგრესიის გამო, ასევე, როცა მგზავრები ჩამოუყრიათ ტაქსიდან, ან, თუნდაც, თვითონ მგზავრს შეუწყვიტავს გადაადგილება ტაქსით”, – განმარტავს ბახტურიძე.
როგორც ის აღნიშნავს, ტაქსის ზოგიერთი კომპანია თვითონ კრძალავს ავტომობილში თამბაქოს მოხმარებას და ბაზარზე ძალიან წარმატებულები არიან.
“ტაქსის რამდენიმე კომპანიაა, რომელსაც შინაგანაწესის თვალსაზრისით უკვე აქვს აკრძალული თამბაქოს მოხმარება უკვე წლებია და საკმაოდ აქტიურად მუშაობენ ბაზარზე. ახლა უკვე დაიწყო ამ სფეროს რეგულირება. ჩვენ გვეგონა, რომ, თბილისში, მათ შორის, ტაქსებში თამბაქოს მოხმარების აკრძალვის საკითხსაც დააყენებდნენ. თუმცა, სამწუხაროდ, ეს ასე არ მოხდა. ამიტომ, მნიშვნელოვანი იქნება, რომ კანონმა დაარეგულიროს ეს საკითხი და მთელი ქვეყნის მასშტაბით აიკრძალოს ტაქსებში თამბაქოს მოწევა”, – ამბობს გიორგი ბახტურიძე და განმარტებას მსუბუქ ავტომობილებში თამბაქოს მოხმარების შესაძლო აკრძალვასთან დაკავშირებითაც აკეთებს,
“გარკვეული მედიასაშუალებების მიერ არასწორად იყო ინტერპრეტირებული, თითქოს, კერძო ავტომობილებში იკრძალება მოწევა. ეს არის აბსურდი. ჩვენ ვამბობთ მხოლოდ ასეთ რამეს – კერძო ავტომობილებში, არასრულწლოვანის მგზავრობის შემთხვევაში, არის მოწევა აკრძალული. ეს ასეა ბევრ ქვეყანაში”, – ამბობს “თბილისი თაიმსთან” საუბრისას თამბაქოს კონტროლის ალიანსის ხელმძღვანელი, გიორგი ბახტურიძე.
მასალა მოამზადა : მარიამ ტიელიძემ
