უწყებათშორის საბჭოზე გამოვედით ინიციატივით, რომ სემინარებსა და კონფერენციებზე ორჯერადად აცრილი ადამიანები დაიშვან. განცხადება დაავადებათა კონტროლის ეროვნული ცენტრის ხელმძღვანელმა ამირან გამყრელიძემ უწყებათშორისი საბჭოს სხდომის დასრულების შემდეგ გააკეთა.
„ვაქცინაციის წახალისებებს განვიხილავთ და რამდენიმე მოწოდებითაც გამოვედით. განიხილება საკითხი ე.წ. მწვანე სერტიფიკატებთან დაკავშირებით. მე დღეს გამოვედი ინიციატივით, რომ ყველა კონფერენციასა და შეკრებაზე, ისევე, როგორც სემინარებზე, დაუშვან ის ადამიანები, ვინც ორჯერადად აცრილები იქნებიან ან ბოლო 72 საათში გატესტილი; ვაქცინაციას ძალით ვერავინ გააკეთებს, ეს უნდა იყოს თვითშეგნებით“, – განაცხადა გამყრელიძემ.
შეგახსენებთ: მთავრობა აანონსებდა, რომ ორჯერადად ვაქცინირებულები გარკვეულ წახალისებებს მიიღებდნენ, შესაძლოა, ეს ყოფილიყო შეზღუდვის მოხსნა რიგ შემთხვევებში, მაგალითად, პირბადის დახურულ სივრცეში და ა.შ.
