ცოტახნის საზოგადოებისთვის ცნობილი გახდა, რომ კომპანია “ბოდიშოფ”-მა ქალების გაძლიერების მიზნით წიგნი გამოაქვეყნა. როგორც ცნობილია, კომპანია თავის მოვლის საშუალებებსა და კოსმეტიკას აწარმოებს.
წიგნის სათაურია “შეიყვარე შენი თავი“. თუმცა, სოციალურ ქსელში აღნიშნული საკითხი განხილვის საგანი იმ მიზეზით გახდა, რომ მისი შვიდივე ავტორი მამაკაცია.
საკითხის შესახებ “თბილისი თაიმსს” გენდერისტი, მარი მესხი ესაუბრა.
“მამაკაცი რომ ქალის პრობლემებზე წერდეს და საუბრობდეს, ამაში მე პრობლემას ვერ ვხედავ. პრობლემად მე “ბოდიშოფის” კონცეფცია მიმაჩნია. მისი ასეთი ხედვა ჩემთვის ცოტა უცნაური და არასწორია. ამასთანავე, ვიტყვი, რომ იმ ხუთ მამაკაცთან, რომლებიც ავტორები არიან, მე, როგორც ავტორებთან არანაირი პრეტენზია არ მაქვს. რასაც ვამბობ, მათ პროფესიონალიზმს არ აკნინებს, უბრალოდ, არ მგონია, რომ ნაკლები ქალი მწერალი გვყავს. ეს ჩემთვის ცოტა გაუგებარი მხარდაჭერაა”, – აღნიშნავს მესხი.
როგორც გენდერისტი განმარტავს, უკეთესი იქნებოდა, თუკი ავტორები ქალებიც იქნებოდნენ და მამაკაცებიც.
“კარგი იქნებოდა, ავტორებად ქალებიც რომ ყოფილიყვნენ და მამაკაცებიც წარმოდგენილნი.
მე რაც წავიკითხე, ზოგიერთი მიიჩნევს, რომ კაცებს მაინცდამაინც კარგად არ შეუძლიათ ქალების შესახებ წერა. თუმცა, მე ბოლომდე ასე არ ვფიქრობ. მაგრამ ქალების პრობლემებზე, განსაკუთრებით, რაც სხეულს შეეხება, მემგონი, ქალები უკეთ დაწერენ – მათ შორის, რას განიცდიან ფეხმძიმობის, მშობიარობის დროს, იგივე მაშინ, როდესაც ქუჩას მარტო კვეთს გვიან ღამით”, – ამბობს მარი მესხი “თბილისი თაიმსთან” საუბრისას.
მასალა მოამზადა : მარიამ ტიელიძემ
