ადამიანები მუდმივად ვზრუნავთ, ვაკეთოთ ის, რაც გაგვახალისებს და, ამავდროულად, რაღაც ახალს გვასწავლის. სხვები კი იმაზე ზრუნავენ, საზოგადოებას არაერთი ალტერნატივა შესთავაზოს. იქედან გამომდინარე, რომ ყველას საკუთარი გემოვნება და ინტერესები აქვს, სხვადასხვა კომპანია სხვადასხვა მიმართულებით ქმნის პროდუქტს.
კომპანია „პარარა“ მომხმარებლებს სთავაზობს გასაფერადებლებს, რომლებიც ნებისმიერ ასაკსა და ნებისმიერ გემოვნებას ერგება.
„თბილისი თაიმსის“ შეკითხვებს „პარარა“-ს თანადამფუძნებელი, ნინო ჯიბლაძე პასუხობს.
ზოგადად, რა პროდუქტს სთავაზობთ მომხმარებლებს?
კომპანია „პარარა“ სთავაზობს მომხმარებლებს შემოქმედებით და შემეცნებით გრაფიკულ გასაფერადებლებს. ჩვენი გასაფერადებლები, გარდა იმისა, რომ საინტერესო და სახალისოა, სპეციალურად შერჩეული თემატიკით შეიქმნა, რაც ბავშვის სწავლის პროცესსა და მის შემოქმედებით განვითარებას უწყობს ხელს.
„პარარას“ დიდი ზომის გასაფერადებლი სპეციალურად შემუშავდა, რათა რამდენიმე ადამიანმა ერთად შეძლოს გაფერადება, ეს კი ხელს უწყობს ოჯახის წევრებს, მეგობრებს და, რაც მთავარია, მშობლებს, შვილებთან ერთად გაატარონ უფრო მეტი დრო საინტერესოდ და სახალისოდ. დღევანდელ სიტუაციაში, როდესაც ბავშვები
ეკრანდამოკიდებულები არიან, ცოცხალი ურთიერთობები და თამაში ძალიან
მნიშვნელოვანია. სწორედ „პარარა“ იძლევა ამის შესაძლებლობას.
რა ასაკზეა ის ორიენტირებული?
ძირითადად, 4- დან 12 წლამდე ბავშვებისთვის, და არამხოლოდ.
მის დიზაინს ვინ ქმნის?
გრაფიკა შექმნილია ქართველი მხატვრების – გია გორდეზიანისა და შალვა ჯაფარიძის მიერ. შალვა ჯაფარიძე არქიტექტორი გახლავთ, გია გორდეზიანი კი – მხატვარი. ასევე, ცნობილი კომპოზიტორი – „წახნაგა“.
მსურველს ნებისმიერ თემატიკაზე შეუძლია თქვენთან გასაფერადებლის მოძიება?
ამ ეტაპზე, 20-მდე სხვადასხვა თემატიკის გასაფერადებელი გვაქვს.
სამომავლოდ ვგეგმავთ ახალი პროდუქტის დამატებას. ჩვენი მიზანია, რომ შევქმნათ ძალიან ბევრი საინტერესო, შემეცნებითი თემატიკის გასაფერადებლები, ასევე, შევქმნათ გასაფერადებლებთან ასოცირებული სხვადასხვა პროდუქტი, რომელიც ხელს შეუწყობს შემოქმედებითი აზროვნების განვითარებას.
