როდესაც საქმე ჩვენთვის გამორჩეულ თარიღს ეხება, ვცდილობთ, ყველაფერი იდეალურად იყოს. ვარჩევთ ყველაფერ იმას, რაც საუკეთესოა. ტკბილი ორცხობილები დღესასწაულების განუყრელი ნაწილია. ისინი განსაკუთრებულია მაშინ, როდესაც დიზაინი აბსოლუტურად ჩვენს გემოვნებას ასახავს.
“ჯინჯერი” 2018 წლის 1-ელი დეკემბრიდან არსებობს და უკვე მესამე წლეს ითვლის. ყველაფერი შობისა და ახალი წლის სიყვარულით დაიწყო…
“თბილისი თაიმსს” ინნა ახვერდოვა ესაუბრა.
საიდან გაჩნდა იდეა, რომ ასეთი ორცხობილები დაგემზადებინათ?
საქმე ისაა, რომ ძალიან მიყვარს შობა და ახალი წელი, ამ დღეებისთვის სამზადისი ნამდვილი რიტუალია და ყოველთვის ვცდილობ, რომ ყველაფერი იყოს მაღალ დონეზე: ატმოსფერო სახლში, საჩუქრების შეფუთვა, ახალი გემრიელი კერძები და, რაც მთავარია, სადღესასწაულო მაგიდის გაფორმება. სწორედ ამ პერიოდში, დეკემბრის დასაწყისში, ერთ საღამოს, ცხელ ჩაისთან და ფილმის ყურებისას მოვიდა მოგონება საშობაო ორცხობილებზე, რომელიც ძალიან პოპულარულია ამერიკასა და ევროპაში, ეს იდეა არ გაქრა, სანამ არ მოვამზადე, მოვხატე და ხალხთან მივიტანე ჩემი ორცხობილები.
მათ რისგან ამზადებთ?
როდესაც გახსნი ორცხობილების კოლოფს, პირველი, რასაც ხედავ, ეს არის ორცხობილების ვიზუალური მხარე და შემდეგ უკვე იგრძნობა ჯადოსნური არომატი, რომელიც გაჯერებულია დარიჩინითა და ჯანჯაფილით. ხრაშუნა ორცხობილა აისინგთან ერთად იძლევა საოცარ გემოს, თითქოს, მიირთმევ პატარა ტორტს.
თქვენი პროდუქტი ყველანაირ თემატიკასა და გემოვნებაზეა მორგებული?
ყველაზე სასიამოვნო არის ის, რომ ორცხობილები შეიძლება, მოიხატოს ნებისმიერი თემატიკით: დაბადების დღის, ნათლობის, ქორწილის და ნებისმიერი დღესასწაულისთვის. და, რა თქმა უნდა, ყველა ძალიან კმაყოფილია! რაც მთავარია, ქუქისების რეცეპტის ვარირება შეიძლება იმის მიხედვით, თუ ვინ როგორ არომატს ანიჭებს უპირატესობას და, ასევე, გლუტენის გარეშე ორცხობილები.
სიახლეებს თუ გეგმავთ?
გეგმაში გვაქვს ახალი, საინტერესო პროდუქტების დამატება, 1 წლის წინ უკვე დავამატეთ ჩინური ორცხობილები – “ფორტუნა”, ასევე, მასტერ-კლასები ბავშვებისა და დიდებისთვის და სასწავლო კურსი მათთვის, ვინც ქუქისების მოხატვით იქნება დაინტერესებული.
მასალა მოამზადა : მარიამ ტიელიძემ
