ადგილობრივი თვითმმართველობის არჩევნებამდე სულ უფრო ცოტა დრო რჩება. 2 ოქტომბერს საქართველოს მოსახლეობას უკვე ექნება საშუალება, დააფიქსიროს საკუთარი არჩევანი. ამის პარალელურად, დაძაბულობა მატულობს.
როგორია პოლიტიკური ფონი, რას სთავაზობენ პოლიტიკური პარტიები საკუთარ ამომრჩევლებს და რა მეთოდებს მიმართავენ არჩევნებში გამარჯვებისთვის – ამის შესახებ “თბილისი თაიმსს” ანალიტიკოსი, მამუკა არეშიძე ესაუბრა.
“ცოტა უცნაური საარჩევნო კამპანიაა. უფრო მეტია განცხადება, ვიდრე – საარჩევნო შეხვედრები, უბნებზე აქტივობა. ზოგჯერ, ზოგიერთ რაიონში ისეთი შთაბეჭდილება მრჩება, თითქოს, ოპოზიცის დიდი ნაწილი ელოდება არა არჩევნების დღეს, ორ ოქტომბერს, არამედ – სამ ოქტომბერს იმისათვის, რომ დაიწყოს არჩევნების შედეგების გაპროტესტება.
მე ბევრ რაიონში ვერ ვხედავ ოპოზიციური სპექტრის აქტივობას. ეს არ ეხება მხოლოდ თბილისს. ვერ ვხედავ, მაგალითად, თბილისის ცენტრალურ რაიონებში, ვერც მცხეთის რაიონში – გუშინ გახლდით აქ, მინდოდა – მენახა, ამ მხრივ როგორი სიტუაცია იყო. ვფიქრობ, რომ საკმაოდ უცნაურია ასეთი ფორმით ჩატარებული არჩევნები.
ეს რაც აგიტაციასა და მოსახლეობასთან შეხვედრებს შეეხება.
რაც შეეხება დებატებს, ღია პოლიტიკას მედიასაშუალებების მეშვეობით – რაც ხდებოდა საქართველოში წლების განმავლობაში, იმავეს ვხედავთ ახლაც. პლუს, ამას ემატება მეთოდები, ხერხები, რომლებიც აბსოლუტურად ბინძური და, პირადად ჩემთვის, მიუღებელია. ასევეა საზოგადოებისთვისაც. მხარეები ისეთ მეთოდოლოგიებს იყენებენ, რომლებიც, პრაქტიკულად, ქვეყანას ანგრევს, საზოგადოების ფსიქიკას ანგრევს, ისედაც სტრესულ მდგომარეობაში მყოფ ახალგაზრდობას კიდევ უფრო უმძიმებს სურათს”, – განმარტა მამუკა არეშიძემ “თბილისი თაიმსთან” საუბრისას.
