ბოლო დროს სოციალურ ქსელებში ვკითხულობთ პროგნოზებს იმის შესახებ, რომ ჩვენს ქვეყანაში ნავთობის ფასის ზრდაა მოსალოდნელი. არის თუ არა ეს რეალური და რა განაპირობებს საქართველოში ნავთობის ფასის ზრდას – “თბილისი თაიმსს” ეკონომიკის ექსპერტი, იოსებ არჩვაძე ესაუბრა.
“მსოფლიოს ბაზარზე ნავთობის ფასი სისტემატიურად იზრდება. გასული წლის გაზაფხულთან შედარებით, ბარელი ნავთობის ფასმა მოიმატა 39-დან 83 დოლარამდე. საქართველო, ამ მხრივ, არის იმპორტდამოკიდებული ქვეყანა. ჩვენ საკუთარი ნავთობი გვაქვს იმ რაოდენობის, რომ, ხატოვნად რომ წარმოვიდგინოთ, საკმარისი იქნება პირველი იანვრიდან მაქსიმუმ 5-6 იანვრამდე. დანარჩენი 360 დღე აბსოლუტურად იმპორტზე ვართ დამოკიდებული.
როგორი ფასებიც მსოფლიო ბაზარზე ყალიბდება, ეს გავლენას ახდებს ჩვენს შიდა ფასებზე. ამის გამო, ჩვენი ეკონომიკა და ფასები “მძევალია” მსოფლიო ფასების კონიუნქტურის. მეტსაც გეტყვით, რომ ავიღოთ ჩვენი საშუალო წლიური იმპორტი ნავთობპროდუქტების, სადღაც მილიონ 200-დან მილიონ 300 ათას ტონამდეა ყოველწლიურად. ყოველი ერთი ბარელი ნავთობის მხოლო ერთი დოლარით გაძვირება ნიშნავს, რომ ჩვენ, წელიწადზე გადაანგარიშებით, 7.5 მილიონი დოლარით მეტს ვიხდით. წარმოიდგინეთ, 39-დან 83-მდე რომ გაიზრდება, იმავე რაოდენობის ნავთობპროდუქტების იმპორტზე რამდენი დაგვჭირდება.
ეს, საბოლოოდ, აწვება ადგილობრივ მომხმარებელს, იქნება ეს მოსახლეობა თუ ბიზნესი და იწვევს ინფლაციას. ამას ვერ აცდება ვერცერთი სისტემა, იქნება ეს საწვავის ბრენდირებული რეალიზატორი თუ – არაბრენდირებული”, – განაცხადა იოსებ არჩვაძემ “თბილისი თაიმსთან” საუბრისას.
მასალა მოამზადა : მარიამ ტიელიძემ
