ადგილობრივი თვითმმართველობის არჩევნები უკვე ჩატარდა. არჩევნები შეფასდა, როგორც სანდო, გამჭვირვალე და კონკურენტული. ამას ადასტურებენ უცხოელი დამკვირვებლებიც.
თუმცა, გარკვეულ შემთხვევებში, საჭირო გახდა მეორე ტურის ჩანიშვნა. მათ შორის, მეორე ტური იქნება თბილისში, სადაც ერთმანეთს დაუპირისპირდებიან მმართველი პარტიიდან კახა კალაძე და „ერთიანი ნაციონალური მოძრაობიდან“ – ნიკანორ მელია.
რა გახდა მიზეზები, რის გამოც დედაქალაქში მეორე ტურის ჩატარება გახდა საჭირო – ამის შესახებ „თბილისი თაიმსს“ ანალიტიკოსი, ზაალ ანჯაფარიძე ესაუბრა.
„მიზეზი არის რამდენიმე. სააკაშვილის ჩამოსვლას, რამდენადაც მე საკმაოდ სანდო წყაროებიდან მაქვს ინფორმაცია, “ნაციონალურ მოძრაობას” შემატა რამდენიმე პროცენტი. რეალურად, მოახდინა„ნაციონალური მოძრაობის” ამომრჩევლის მობილიზება და, გარკვეულწილად, წამოიყვანა სხვა, ენმ-ის სატელიტი პარტიებიდან “ნაცმოძრაობის” მხარეს. ისინი სააკაშვილში ჯერ კიდევ ხედავენ წინააღმდეგობის მთავარ სიმბოლოს, რომელსაც, მათი აზრით, შეუძლია “ქართული ოცნების” ჩამოშორება ხელისუფლებიდან.
მეორე მომენტი არის ის, რომ, როგორც ჩანს, “ქართული ოცნების” სამობილიზაციო რესურსმა სათანადოდ ვერ იმუშავა. როგორც დავითვალეთ, დაახლოებით, 150 000 ხმა დააკლდა მმართველ პარტიას წინა არჩევნებთან შედარებით. კი, მართალია, სააკაშვილის ჩამოსვლამ მოახერხა”ქართული ოცნების” ამომრჩევლის მობილიზება, მაგრამ არა იმ დოზით, რა დოზითაც საკმარისი იქნებოდა, რათა “ოცნებას” გადამწყვეტი გამარჯვება მოეპოვებინა.
მესამე ფაქტორი გახლავთ “გახარიას ეფექტი”. მან გაიყოლა “ქართული ოცნების” ამომრჩევლის ერთი ნაწილი. თუმცა, მე არ ვფიქრობ, რომ ეს მესამე ფაქტორი გადამწყვეტი იყო. რეალურად, “ქართულმა ოცნებამ” ადგილობრივ არჩევნებში აიღო, დაახლოებით, 47%, რაც მხოლოდ ერთი პროცენტით ჩამორჩება საპარლამენტო არჩევნებში მის მიერ მიღებულ შედეგს. ახალ შექმნილი პარტიის პირობაზე, გახარიას პარტიამ არც თუ ისე ურიგო შედეგი დადო. ეს ხმები, დიდი ალბათობით, წავიდოდა “ქართულიოცნების” ყულაბაში. შესაბამისად, ზოგიერთ მუნიციპალიტეტში მეორე ტურის საჭიროება აღარიქნებოდა“, – განმარტავს ანალიტიკოსი.
ანჯაფარიძე ყურადღებას გარკვეული მედია საშუალებების მიერ წინასაარჩევნო პერიოდში გავრცელებულ ინფორმაციებზეც ამახვილებს.
„მნიშვნელოვანი როლი ჰქონდა “ნაცმოძრაობის” მომსახურე ტელეარხებს. მათმა გამუდმებულმა, საინფორმაციო, ფსიქოლოგიურმა შეტევამ მოსახლეობაზე და ტყუილ-მართალი ინფორმაციის გავრცელებამ საკმაო გავლენა იქონია არჩევნების შედეგებზე.
ერთობლიობაში, ყველა ეს ფაქტორი რომ ავიღოთ, შეიძლება, ვივარაუდოთ, რომ სწორედ ამან გამოიწვია ის შედეგი, რაც დადგა.
“ქართულმა ოცნებამ” დაძლია 43%-იანი ბარიერი, მოიხსნა ვადამდელი არჩევნების ჩატარების საკითხი- ეს არის ერთერთი მთავარი შედეგი. გარდა ამისა, ოპოზიციის მიერ დაანონსებული რეფერენდუმი ქვეყნის საგარეო პოლიტიკურ კურსზე არ შედგა, რადგან ეს რომ ასე ყოფილიყო, მაშინ “ქართული ოცნება” ამ არჩევნებში დამარცხებოდა. ის, რომ 20 მუნიციპალიტეტში მეორე ტური იმართება, თუ ოპოზიციისთვის არის გამარჯვება, კი ბატონო, შეუძლიათ, იყვნენ კმაყოფილები. თუმცა, მე დარწმუნებული ვარ, მეორე ტურში, უმეტსად, ისევ “ქართული ოცნების” კანდიდატები გაიმარჯვებენ“, – განაცხადა ზაალ ანჯაფარიძემ „თბილისი თაიმსთან“ საუბრისას.
მასალა მოამზადა : მარიამ ტიელიძემ
