მოგეხსენებათ, 2 ოქტომბრის თვითმმართველობის არჩევნებმა უკვე ჩაიარა და სულ მალე ცენტრალური საარჩევნო კომისია საბოლოო შედეგებს გამოაქვეყნებს, თუმცა მანამდე, მნიშვნელოვანია ვიცოდეთ, თუ როგორ გარემოში მიმდინარეობდა არჩევნები, იყო თუ არა სერიოზული დარღვევები და ა.შ
არაერთი საერთაშორისო თუ ადგილობრივი არასამთავრობო ორგანიზაციის შეფასებით, 2020 წლის საპარლამენტო არჩევნებთან შედარებით, მუნიციპალურ ორგანოთა არჩევნები მშვიდ და თითქმის უსაფრთხო გარემოში მიმდინარეობდა, თუმცა რამდენიმე საათის წინ აშშ-ს საელჩომ საქართველოში გაავრცელა განცხადება, რომლის მიხედვითაც, აშშ გამოთქვამდა შეშფოთებას არჩევნებზე მთელი რიგი დარღვევებისა და არაშესაბამის გარემოში ჩატარების გამო.
ეს ერთი შეხედვით საერთო სურათია, თუმცა უნდა ვისაუბროთ იმაზე, თუ კონკრეტულად რა ტიპის დარღვევებს ჰქონდა ადგილი საარჩევნო უბნებზე. „სამართლიანი არჩევნებისა და დემოკრატიული საზოგადოების ცენტრი“ აქვეყნებს ანგარიშს, სადაც დეტალურად წარმოგვიდგენს იმ დარღვევებსა თუ ექსესებს, რასაც ადგილი ჰქონდა არჩევნებზე.
მაგალითისთვის, თბილისის რამდენიმე ოლქსა და უბანში დაირღვა მარკირების წესი, მცხეთის ერთ-ერთ საარჩევნო უბანში ადგილი ჰქონდა ამომრჩევლის მოსყიდვის მცდელობას, ქართული არჩევნებისთვის მოუშორებელი სენი- პარტიის კოორდინატორების მორიგეობა და პირადი ინფორმაციების შეგროვება კვლავ შეინიშნებოდა. საბურთალოს საარჩევნო ოქმის რამდენიმე უბანსა და რუსთავის რამდენიმე უბანზე დაფიქსირდა ელექტროენერგიის მიწოდების განზრახ შეზღუდვის ფაქტი. ასევე თბილისის რამდენიმე უბანზე დაირღვა საარჩევნო უბნის ტერიტორიაზე ფოტო-ვიდეო გადაღების აკრძალვის წესი…
და მაინც, მიუხედავად ამისა ხელისუფლება და ზოგიერთი არასამთავრობო ორგანიზაცია მიიჩნევს, რომ ადგილობრივი თვითმმართველობის არჩევნები მშვიდ და ჯანსაღ გარემოში წარიმართა, რასაც ოპოზიცია კატეგორიულად არ ეთანხმება და სანაცვლოდ მთელ რიგ დარღვევებზე საუბრობს. ძალზე მნიშვნელოვანია კიდევ ერთხელ ვახსენოთ აშშ-ს საელჩოს განცხადება, რომელშიც წერია:
„ამერიკის შეერთებული შტატები იზიარებს ეუთო/ოდირის პირველად შეფასებას, რომ არჩევნები ტექნიკურად კარგად იყო ადმინისტრირებული, მაგრამ საარჩევნო გარემო დაზიანებული იყო..“
მასალა მოამზადა: თორნიკე ყრუაშვილმა
