“ნახევრად ცქრიალა, მომჟავო ღვინო, რომელიც ჩაჟუჟუნებას იწვევს” – ასე ხასიათდება პროდუქტი, რომლის შესახებაც ამ მასალაში წაიკითხავთ. ბიზნესის ისტორიაზე, მის წარმატებებსა და სამომავლო გეგმებზე “თბილისი თაიმსს” “ჟუჟუნას” ერთერთი დამფუძნებელი, გიორგი ტაბატაძე ესაუბრა.
“ჟუჟუნა”, როგორც კომპანია 2017 წელს დავაარსეთ. 2018 წელს უკვე ბაზარზე გამოვჩნდით. რეალურად, თავდაპირველად, დავიწყეთ მხოლოდ ჩამოსასხმელი ფორმით რეალიზება, როგორც ბარებში დგას ჩამოსასხმელი სისტემა, მსგავსი სისტემით ვვაჭრობდით ფესტივალებზე. ეს ყველაფერი საკმაოდ კარგად მიმდინარეობდა.
შემდეგ უკვე, როდესაც პანდემია დაიწყო, ცოტა გაგვიჭირდა, რადგან, “ლოქდაუნთან” ერთად, დაიხურა ყველა ადგილი, სადაც ჩვენ ვმუშაობდით. მივხვდით, რომ ასე ვეღარ გავაგრძელებდით და ავიღეთ სესხი. ვიყიდეთ ჩამოსახმელი მოწყობილობა და ღვინო ჩამოვასხით პატარა, 250-მილილიტრიან ბოთლებში.
ახლა გვაქვს ის პერიოდი, როდესაც ამ ბოთლებით ვცდილობთ, რომ გავშალოთ ჩვენი საქმიანობა. შევედით უკვე მთელი საქართველოს საცალო ვაჭრობაში და რამდენიმე ქსელში იყიდება ჩვენი პროდუქცია. ამასთან, გვაქვს ექსპორტის მცდელობები”, – აღნიშნავს რესპონდენტი და ექსპორტთან დაკავშირებულ დეტალებზე საუბრობს.
“პირველად, ჩვენი ღვინო გავგზავნეთ ჩინეთში. ეს იყო ზაფხულში. ეს ტვირთი უკვე ჩასულია. ახლახან, შედარებით მოზრდილი პარტია გავგზავნეთ იაპონიაში, რაც ძალიან გვახარებს.
სიახლეებთან დაკავშირებით კონკრეტულად არაფრის თქმა შემიძლია. ეს უკანასკნელი იყო, ამ დროისთვის, ჩვენი ბოლო გეგმა, რაც შევასრულეთ კიდეც. ამ მიმართულებით ჯერ კიდევ ძალიან ბევრია სამუშაო. ეს ყველაფერი ძალიან შრომატევადია. შესაძლოა, შემდეგი რთველისთვის რაიმე სიახლეც ვიხილოთ”, – ამბობს გიორგი ტაბატაძე ჩვენთან საუბრისას.
მასალა მოამზადა : მარიამ ტიელიძემ
