ამბავი იმისა, თუ როგორ შექმნა სამი შვილის დედამ სათამაშოების ზღაპრული სამყარო – დღეს ჯეინ გომურაშვილსა და მის თოჯინებზე გიამბობთ. ჯეინმა ნაქსოვი სათამაშოების დამზადება ხუთი წლის წინ დაიწყო – როდესაც პირველი შვილის მოლოდინში იყო.
იქედან გამომდინარე. რომ ხელსაქმე მისთვის ჯერ კიდევ მცირე ასაკიდან იყო ცხოვრების განუყოფელი ნაწილი, გადაწყვიტა, საკუთარი შვილებისთვის თავად შეექმნა ეკოლოგიურად სუფთა სათამაშოები. შემდეგ უკვე, ისინი მთელი საქართველოსთვის გახდა ხელმისაწვდომი და მეტიც – ქვეყნის ფარგლებსაც გასცდა,
დეტალებზე “თბილისი თაიმსს” ჯეინი თავად ესაუბრა.
“როდესაც პირველ შვილს ველოდებოდი, ყველა მომავალი დედის მსგავსად, ვფიქრობდი – რა შემეძინა წინასწარ ბავშვისთვის. ბავშვობიდან, 6 წლის ასაკიდან ხელსაქმით ვარ დაკავებული – ვქსოვ. გადავწყვიტე, რომ მეც შევძლებდი საკუთარი შვილისთვის რაღაცების მოქსოვას.
ინტერნეტში დავიწყე ძებნა, როგორი მოდელების შერჩევა ჯობდა. გადავაწყდი ხელით ნაქსოვ სათამაშოებს. საქართველოს ბაზარზე იმ დროს მსგავსი რამ არ არსებობდა. ძალიან დავინტერესდი, რომ ეს მე თვითონვე შემესწავლა – რაც მთავარია, ეს სათამაშოები იქნებოდა ეკოლოგიურად სუფთა. თავიდან ეს მიზანი მქონდა, რომ საკუთარი შვილებისთვის დამემზადებინა”, – ამბობს ჯეინი და საუბრობს, თუ როგორ გაუჩნდა იდეა, სათამაშოები რეალიზებისთვის დაემზადებინა.
“შემდეგ უკვე, როდესაც მოვსინჯე და მივხვდი, რომ კარგად გამომდიოდა, გადავწყვიტე, დეკრეტული პერიოდი ამ ჩემი სათამაშოებისთვის გამომეყენებინა. ვცდილობდი, ორი საქმე ერთად მეკეთებინა – დედაც ახალბედა ვიყავი და, სიმართლე გითხრათ, არც მეცალა ხელსაქმისთვის. თუმცა, ფარ-ხმალი არ დავყარე და, უამრავი სირთულის მიუხედავად, გავაგრძელე სათამაშოების დამზადება”.
ჯეინის თოჯინები გასცდა საქართველოს ფარგლებს, გასცდა კონტინენტს და მთელი მსოფლიოს ბავშვებისთვის გახდა ხელმისაწვდომი.
“ჩემი თოჯინები მხოლოდ საქართველოში არ იყიდება. თუკი სადმე რაიმე გამოფენა ყოფილა, თითქმის ყველგან მაქვს მონაწილეობა მიღებული. ცხადია, გამოფენებზე ძალიან ბევრი უცხოელი ყიდულობ ჩემს ნამუშევრებს. რაც პანდემია დაიწყო და ბაზრობები აიკრძალა. მე შევქმენი ჩემი ონლაინ მაღაზია – ხელნაკეთი სათამაშოები ყველაზე დიდი პლატფორმის ფარგლებში – ETSY, რაც მსოფლიოში არსებობს. თავიდან, ცხადია, დრო დასჭირდა, რადგან იქ არის მილიონობით პროდუქციაა განთავსებული. აქ მთელი მსოფლიოდან არიან წარმოდგენილები. დღეს მაქვს საუკეთესო რეიტინგი, რაც შეიძლება, არსებობდეს.
90 % დამკვეთებისა არიან აშშ-დან. ასევე, არის გერმანია, დიდი ბრიტანეთი, ახალი ზელანდია, ავსტრალია და ა.შ.”
მასალა მოამზადა : მარიამ ტიელიძემ
