რა განუმეორებელი თვისებებით ხასიათდება ვირის რძე და, უფრო ზუსტად, რატომ არ ის სასარგებლო ბავშვებისა და სხვადასხვა დაავადების მქონე ადამიანებისთვის. ფერმა, რომლის შესახებაც ამ მასალაში წაიკითხავთ, 2016 წელს ჩამოყალიბდა – გარდაბნის რაიონის სოფელ სააკაძეში.
ფერმერის მფლობელობაშია 100 სული სახედარი – ის ქირაობს 25 ჰექტარ მიწის ნაკვეთს საძოვრისათვის. ფერმაში დაკავებულია 5 თანამშრომელი. საინტერესოა, რომ აქ იწარმოება რძე, რძის ფხვნილი, ხელნაკეთი საპნები, კრემები, შოკოლადი, ლიქიორი.
ფერმა „სახედარის“ დამფუძნებელი და ხელმძღვანელი, თემურ ლომიძე “თბილისი თაიმსს” საკითხის შესახებ დეტალურად ესაუბრა.
როგორ ფიქრობთ, რა ნაბიჯები უნდა გადადგას სახელმწიფომ თქვენი საქმიანობის მხარდასაჭერად?
სახელმწიფოს პირდაპირი მონაწილეობა არის საჭირო იმიტომ, რომ ეს პროდუქტი (რძე) აუცილებელია, მიიღოს ყველა ბავშვმა, საბავშვო ბაღში, ყოველ დილით 30-50 გრამი. სახედრის რძე ამაღლებს იმუნიტეტს, რადგან იგი 97%-ით არის მიახლოებული დედის რძესთან.
ჩემი 5-წლიანი გამოცდილებიდან გამომდინარე, ვამტკიცებ, რომ ამ დროის განმავლობაში, რაც კი რძე გამიცია ბავშვებისათვის, ყველა ბავშვი 100%-ით გამოჯანმრთელებულა. უკუჩვენება არ აქვს.
სახელმწიფომ უნდა დაუშვას და სპეციალურ დოტაციაზე უნდა აიყვანოს ყველა ის ფერმა, რომელიც შეიქმნება. სურვილი მაქვს – რაც მეტი, მით უკეთესი. ეს დაფინანსება უნდა განხორციელდეს სახელმწიფოს მონიტორინგის ქვეშ – ის ფერმერს განსაკუთრებით სჭირდება პირველი 3 წლის განმავლობაში.
ამავდროულად, სახელმწიფო უნდა დაეხმაროს ფერმერებს, რომ შეიტანონ სახედრის რძე ბაგა ბაღებში, საქართველოს ფარგლებში.
თქვენ თუ გიცდიათ, მათთვის მიგემართათ?
რა თქმა უნდა, მთავრობასა და პარლამენტში, დღესაც მისმენენ და ვსაუბრობთ ამ საკითხზე, მაგრამ ჯერ ამისათვის მზად არ არიან.
ჯანდაცვის სფეროს მონაწილეობას როგორ ხედავთ თქვენს ბიზნესში?
ერთადერთი სამინისტრო, სადაც მივწერეთ და პასუხიც კი არ მოგვწერეს, არის დევნილთა, შრომის, ჯანმრთელობისა და სოციალური დაცვის სამინისტრო, არა და, ჩემი ხედვით, პირველ ყოვლისა, ამ სამინისტრომ უნდა მოითხოვოს დაჟინებით, რომ ასეთი სახის პროდუქტი გაიყიდოს ან დაიშვას აფთიაქებში.
ამ დრომდე, როგორ შეაფასებთ თქვენი პროდუქციით მიღებულ შედეგებს?
მიღებული შედეგები არის სასწაულად დადებითი. ამ პროდუქტს რომ კარგი და დადებითი შედეგი არ ჰქონდეს, მე და ჩემს ფერმას დიდი ხნის წინ მუშაობის უფლებას შეგვიჩერებდნენ.
ჩემს ფერმას ამ ხუთი წლის მანძილზე 6000 ბავშვი და ზრდასრული პაციენტი ჰყავს განკურნებული. უმრავლესობის მისამართები და ტელეფონის ნომრები ჩვენ გვაქვს შენახული.
მასალა მოამზადა : მარიამ ტიელიძემ